لکھنؤ: حکومت کسانوں کو فوری طور پر معاوضہ دے: اجے کمار للو

سیلاب کے زد میں آئے درجنوں گاؤں کے کسانوں کو کانگریس کے صدر اجے کمار للو نے حکومت سے فوری طور پر معاوضہ دینے کا مطالبہ کیا ہے

لکھنؤ: ندیوں کے پشتوں کی حفاظت کے تئیں ریاستی حکومت پر لاپراوہی کا الزام لگاتے ہوئے اتر پردیش کانگریس کے صدر اجے کمار للو نے کہا کہ درجنوں گاؤں سیلاب کی زد میں ہیں۔ دھان اور گنے کی فصلیں ڈوب چکی ہیں۔ حکومت کو چاہئے کہ وہ کسانوں کو فوری طور پر معاوضہ دے تاکہ انہیں اس تباہی میں کچھ راحت مل سکے۔
للو نے ہفتہ کے روز جاری ایک بیان میں کہا کہ گزشتہ ایک ہفتہ سے وہ سیلاب زدگان سے ملاقات کررہے ہیں۔ بہرائچ سے بلیا تک، صورتحال خوفناک ہے۔ پشتوں کی حالت انتہائی ابتر ہے۔ انہوں نے کہا کہ 'اس سے حکومت کی لاپرواہی واضح طور پر عیاں ہو جاتی ہے۔'
اجے کمار للو نے کہا کہ 'سیلاب میں بے پناہ عوامی املاک کا نقصان ہوا ہے۔ حکومت کو فوری طور پر متاثرہ عوام کی مدد کرنی چاہئے۔ گونڈہ، بہرائچ، بارہ بنکی، کشی نگر، گورکھپور، دیوریا، بلیا، مئو، اعظم گڑھ سمیت متعدد اضلاع میں گنے اور دھان کی فصلیں زیر آب ہو گئیں ہيں۔
انہوں نے کہا کہ 'ریاست کے کسان کئی برسوں سے قدرتی آفات اور ریاست کی کسان مخالف حکومت کی پالیسیوں کا شکار ہو رہے ہیں۔ ان کی جیب میں ایک پیسہ تک نہیں ہے۔ حکومت فوری طور پر سیلاب کو آفت قرار دے۔