غازی آباد سے بی جے پی کے رکن پارلیمان اور وزیر مملکت جنرل وی کے سنگھ کی گمشدگی کے فرضی پوسٹر لگانے والے سماج وادی پارٹی کے رہنما جیتو شرما اور اس کے دو ساتھیوں کو کوی نگر پولیس نے گرفتار کرلیا ہے۔
ان پر یہ الزام لگایا گیا ہے کہ شہر میں فرضی پوسٹر چسپاں کرنے کے بعد مذکورہ تینوں جن میں جیتو کے علاوہ شارق اور چیتن شامل تھے وہ جنرل وی کے سنگھ کی رہائش گاہ پہنچے اور وہاں موجود افراد دیپک، راگھو اور کلدیپ سے رکن پارلیمان کا پتہ پوچھا۔
پتہ پوچھ لینے کے بعد تینوں ملزمین نے رہائش گاہ پر موجود لوگوں کو 501 روپے کا انعام دے دیا جس پر وہاں موجود افراد ناراض ہوگئے۔
الزام ہے کہ اس کے بعد ایس پی رہنما جیتو شرما نے ان افراد پر فائرنگ کردی شور سن کر جب وہاں لوگ جمع ہونے لگے تب ملزمین وہاں سے فرار ہوگئے۔ فی الحال پولیس نے ان تینوں افراد پر اقدام قتل کا مقدمہ درج کر کے انھیں گرفتار کر لیا ہے۔
واضح رہے کہ سماج وادی پارٹی کے سابق شہری ترجمان جیتو شرما نے منگل کی شام شہر میں لاپتہ رکن پارلیمان کے فرضی پوسٹر چسپاں کیے تھے، جس میں لکھا تھا کہ لاپتہ رکن پارلیمان جنرل وی پی سنگھ کا پتہ دینے والے شخص کو 501 روپے کا انعام دیا جائے گا۔
حالانکہ پوسٹر چسپاں کرنے کے اطلاع ملنے کے بعد پولیس انتظامیہ میں کھلبلی مچ گئی تھی اور شہر سے تمام پوسٹرز فوری طور پر ہٹائے دیے گئے تھے۔
حتیٰ کہ خود اے ڈی ایم سٹی شیلندر سنگھ نے پولیس کے ساتھ جاکر پوسٹرز کو ہٹا دیا تھا، پوسٹرز کے حوالے سے شہر میں طرح طرح کے چرچے شروع ہوگئے تھے اس کے بعد رات ہونے والے واقعہ نے سب کو حیران کردیا۔
مذکورہ واقعے میں دیپک راگھو نے پولیس میں شکایت درج کرائی جس کی بنیاد پر تینوں کے خلاف اقدام قتل کا مقدمہ درج کیا گیا ۔
ایس ایس پی سدھیر کمار سنگھ کے مطابق جیتو شرما اور اس کے دو دیگر ساتھی شارق اور چیتن کو بھی گرفتار کر لیا گیا ہے۔ ملزمین سے مرکزی وزیر مملکت کی رہائش گاہ پر فائرنگ میں استعمال ہونے والے آتشیں اسلحہ کے بارے میں پوچھ گچھ کی جارہی ہے۔
