ریاست اتر پردیش کے ضلع مرادآباد میں انڈین یونین مسلم لیگ کے کارکنان نے ڈی ایم راکیش کمار کے ذریعہ صدر جمہوریہ کو ایک میمورنڈم ارسال کیا ہے جس میں کہا گیا ہے کہ فرانس میں حضرت محمد صلی اللہ علیہ وآلہٖ وسلم کا کارٹون بنا کر جو توہین کی گئی ہے وہ دہشت گردی سے زیادہ سنگین جرم ہے، پیغمبر اسلام کی توہین دراصل اسلام اور مسلمانوں کے خلاف ایک بڑی دہشت گردی کی کارروائی ہے۔
انڈین یونین مسلم لیگ کے نیشنل جوائنٹ سیکریٹری کوثر حیات خان نے کہا مسلم لیگ فرانس حکومت کی پر زور مذمت کرتی ہے اور ہمارا مطالبہ ہے کہ ملک کی عوام کے احساسات کا احترام کرتے ہوئے فرانس حکومت سے فوراً معافی مانگنے کو کہا جائے۔
مرکزی حکومت نے فرانس کی اس حرکت کو نظر انداز کرتے ہوئے فرانس کے ساتھ کھڑے ہونے کا اعلان کیا ہے یہ حکومت کا ایک غلط قدم ہے، اس دوران مسلم لیگ نے مطالبہ کیا ہے کہ مودی حکومت اپنی حمایت کے اعلان کو واپس لے اور فرانس حکومت کی مذمت کرے۔
