ریاست اترپردیش کے شہر بریلی میں واقع فضل الرحمٰن اسلامیہ انٹر کالج ان دنوں تعلیمی ادارے سے کہیں زیادہ سیاسی گھمسان اور تنازع کا میدان بن گیا ہے۔
یہاں دو کمیٹیز کے درمیان آپسی تنازع اور تصادم عروج پر ہے اور اس کالج کے ملازمین اور خاص طور پر پرنسپل اس تنازعات کا شکار ہورہے ہیں۔
واضح رہے کہ پہلے ایک کمیٹی جب طاقت میں تھی تو اُس نے پرنسپل نظم الحسن کو رٹائرمنٹ سے ایک دن قبل برخاست کردیا تھا۔ وہیں دوسری جانب جب دوسری کمیٹی طاقت میں آئی تو اُس نے موجودہ پرنسپل جاوید خالد کو برخاست کردیا ہے۔
پرنسپل جاوید خالد کا کہنا ہے کہ اُنہیں بغیر کوئی وجہ بتائے یا نوٹس دیے معطل کرنے کے بعد برخاست کیا گیا ہے جو غیر قانونی ہے۔
ایسا خیال کیا جاتا ہے کہ فضل الرحمٰن اسلامیہ انٹر کالج خود میں تاریخ کا ایک صفحہ ہے جسے اب سے تقریباً ایک صدی قبل مشہور و معروف سماجی کارکن فضل الرحمٰن عرف چُنّا میاں نے مسلم معاشرے کی نسل نو کو تعلیم سے روشناس کرانے کے مقصد سے تعمیر کرایا تھا۔
تاریخ کے صفحات کے اُلٹنے کے ساتھ ساتھ اس تعلیمی درس گاہ میں درس و تدریس کا سلسلہ کہیں پیچھے چھوٹ گیا ہے اور کمیٹیز آپس میں تصادم کرتی رہیں۔
ایسا ہی ایک تازہ ترین معاملہ یہ ہے کہ موجودہ کمیٹی نے پرنسپل ڈاکٹر جاوید خالد کو برخاست کردیا ہے جبکہ برخاستگی سے قبل اُنہیں معطل کیا گیا تھا۔
اس برخاستگی کے بعد کالج کے تمام اساتذہ مشتعل ہو گئے ہیں اور کالج میں درس و تدریس کا کام بند کردیا، تاہم تمام اساتذہ پرنسپل جاوید خالد کو بحال کرنے کا مطالبہ کررہے ہیں۔
پرنسپل جاوید خالد کی برخاستگی کے بعد کالج کے تمام اساتذہ غیرمعینہ دھرنے پر بیٹھے ہیں، لہٰذا دیگر کالج کے اساتذہ بھی پرنسپل جاوید خالد کی حمایت میں دھرنے پر پہنچ کر پرنسپل کو بحال کرنے کا مطالبہ کررہے ہیں تمام رہنما، کارپوریٹرز اور سماجی کارکنان بھی دھرنے پر پہنچ کر پرنسپل کی حمایت کررہے ہیں۔
