بارہ بنکی میں کسانوں کا احتجاجی مظاہرہ

بارہ بنکی میں کسانوں سے دھان نہیں خریدا جارہا ہے اور اگر خریدا جارہا ہے تو انہیں مناسب قیمت نہیں مل رہی ہے۔ جس کی وجہ سے کسان ہزاروں ٹرالی دھان لیکر شہر آگئے ہیں اور احتجاجی مظاہرہ کر رہے ہیں۔

ریاست اترپردیش کے ضلع بارہ بنکی میں کسانوں کو دھان کی مناسب قیمت نہ ملنے اور دھان خرید مراکز پر بدنظمی کے خلاف بھارتیہ کسان یونین (ٹکیت) کی قیادت میں کسانوں نے سیکڑوں ٹرالی دھان کے ساتھ شہر میں ڈیرہ ڈال دیا ہے۔

کسان اپنے دھان کو وہیں خریدے جانے پر اڑے ہوئے ہیں۔ متعدد دفعہ افسران سے مذاکرات کے باوجود ان کے مسئلے کا حل ابھی تک نہیں ہوسکا ہے۔

واضح رہے کہ آج کی صبح بھارتیہ کسان یونین کی قیادت میں سیکڑوں کسانوں نے شہر کے گنا دفتر پر احتجاج کیا۔

ذرائع کے مطابق، تقریبا 700 ٹرالی دھان کسان شہر لیکر پہنچ گئے ہیں۔ کچھ ٹرالی گنا دفتر کے پاس، کچھ جی آئی سی کے میدان میں اور کچھ سڑکوں پر کھڑی کر دی گئی ہیں۔

کسانوں کا کہنا ہے کہ ان کا دھان خرید مراکز پر نہیں لیا جا رہا ہے۔ اس لیے وہ اپنا دھان لیکر شہر آگئے ہیں۔

ان کا مطالبہ ہے کہ ان کا دھان اب یہیں سے خریدا جائے۔ شہر میں اتنی زیادہ ٹرالیوں کے آنے سے دن بھر ٹریفک جام جیسی صورتحال بنی رہی۔ انتظامیہ کی جانب سے کسانوں کو منانے کے لیے متعدد دفعہ مذاکرات کی کوشش کی گئی لیکن بات نہیں بنی۔

بارہ بنکی میں کسانوں کا احتجاجی مظاہرہ

بھارتیہ کسان یونین (ٹکیت) کے ریاستی نائب صدر رام کشور پٹیل نے کہا کہ کسانوں کو دھان کی مناسب قیمت نہیں مل پا رہی ہے۔ اس کی وجہ نئے زرعی قوانین ہیں۔

انہوں نے کہا کہ دھان کی قیمت دھان خرید مراکز پر اور بازار کی قیمت میں اتنا فرق کبھی نہیں ہوا۔

انہوں نے کہا کہ دھان خرید میں بیچولیہ لگے ہوئے ہیں۔ انہوں نے کہا کہ جب ان کا دھان یہاں سے نہیں خریدا جائے گا تو وہ یہیں رہیں گے اور بعد میں وہ اسے لیکر لکھنؤ چلے جائیں گے۔