بارہ بنکی: سات ہزار روپے فی بیگھے کے حساب سے معاوضہ کا مطالبہ

لکھیم پور تشدد معاملے میں مرکزی وزیر اجے مشرا ٹینی کی برخاستگی اور کسانوں کے تمام مسائل پر ریاست اتر پردیش کے بارہ بنکی میں بھارتیہ کسان یونین (ٹکیت) نے قومی قیادت کی اپیل پر احتجاج کیا اور اپنے مطالبات کا میمورنڈم ضلع انتظامیہ کو سونپا۔

کسان یونین کا مطالبہ ہے کسانوں کو ان کے نقصان کا پورا معاوضہ دیا جائے۔ ساتھ ہی دھان کی فصل کو بارش سے ہوئے نقصان کا 7 ہزار روپے فی کچا بیگھہ کے حساب سے معاوضہ دیا جائے۔

اس سے قبل کسان یونین کے کارکنان گنا دفتر پر یکجہ ہوئے۔ اس کے بعد مارچ نکالتے ہوئے کلکٹریٹ پہنچے۔ اس دوران کئی دفعہ ان کی پولیس اہلکاروں کے ساتھ نوک جھوک بھی ہوئی۔ کلکٹریٹ پہونچ کر مجسٹریٹ نے ان کا میمورنڈم لیا۔

اس دوران یونین کے سر پرست آتم ورما نے کہا کہ 'لکھیم پور تشدد معاملے میں جب تک مرکزی وزیر کی برخاستگی نہیں کی جاتی اس وقت اس معاملے کی شفاف اور غیر جانبدارانہ طریقے سے تحقیقات نہیں ہو سکتیں۔'

انہوں نے کہا کہ 'اس کے ساتھ ہی کسانوں کے دیگر مسائل کو لیکر بھی میمورنڈم دیا ہے۔ ان کا کہنا ہے کہ کسانوں کو نقصان کا مناسب معاوضہ نہیں دیا جاتا ہے۔ انہوں نے کہا کہ بارش سے امسال دھان کی 75 فیصد فصل خراب ہو گئی ہے۔ اس لیے انہیں فی کچا بیگھہ کے حساب سے 7 ہزار روپے کا معاوضہ دیا جانا چاہیے۔