پولیس نے بتایا کہ 'بلسی تحصیل کے گرام صدر پور کے رہنے والے 47 برس کے کسان ہیم سنگھ نے سنہ 2010 میں بھومی وکاس بینک سے مرغی فارم کھولنے کے لئے 80 ہزار روپے کا قرض لیا تھا۔ قرض اب بڑھ کر 2 لاکھ 50 ہزار سے زیادہ ہوگیا تھا جس کی وصولی کے لئے بینک کے ملازمین مسلسل کسان پر دباؤ ڈال رہے تھے۔
معاشی صورت حال ٹھیک نہیں ہونے کی وجہ سے ہیم سنگھ قرض چکا نہیں پارہے تھے اس لئے انہوں نے گزشتہ رات پھندہ لگا کر خودکشی کرلی۔
اہل خانہ نے بتایا کہ بینک ملازمین کے ساتھ ساتھ تحصیل کا امین بھی وصولی کے لئے کسان پر دباؤ ڈال رہا تھا۔ وصولی ملازمین اس کا ٹریکٹر بھی کھینچ کر لے جانے لگے جسے بمشکل گاؤں والوں نے رکوایا۔ بینک ملازمین نے ہیم سنگھ کو 10 تاریخ تک پیسہ جمع کرنے کی ہدایت دی تھی۔ اسی سے پریشان ہوکر ہیم سنگھ نے پھندہ لگا کر خودکشی کرلی۔
