میاں بیوی کے رشتہ کو کافی نازک سمجھا جاتا ہے اور میاں بیوی کے جھگڑوں کے بچوں پر کافی منفی اثرات مرتب ہوتے ہیں۔
اس بات کو نظر میں رکھتے ہوئے رامپور کے خاتون پولیس اسٹیشن میں مرکز برائے صلح و مشاورت ازدواجی مسائل کا قیام عمل میں لایا گیا ہے جبکہ یہاں ہر ہفتہ صبح 10 بجے سے شام 5 بجے تک کونسلرز ڈاکٹر شہناز رحمان، ڈاکٹر کشورسلطان، سنیل شرما ایڈووکیٹ اور سینئر صحافی فضل شاہ فضل کی نگرانی میں میاں بیوی کے درمیان صلح کی کوشش کی جاتی ہے۔
یہاں شوہر اور بیوی کو آمنے سامنے بٹھا کر ان کی شکایت کو سنا جاتا ہے اور دونوں فریقین اور گھر کے دوسرے افراد کے ساتھ صلح سمجھوتہ کرانے کی کوشش کی جاتی ہے۔
ڈھائی سال سے جاری مرکز برائے صلح و مشاورت ازدواجی مسائل سے ہر عمر کے جوڑے اپنے مسائل کے ساتھ رجوع ہورہے ہیں جبکہ اس ہفتہ چالیس شکایتوں کی سماعت کی گئی جس میں چار اجڑتے گھروں کو دوبارہ بسایا گیا، 8 معاملوں کو مسترد کردیا گیا اور اٹھائیس معاملوں کو اگلے ہفتہ مدعو کیاگیا۔
ٹوٹتے اور بھکرتے رشتوں کو جوڑنے کی اس کوشش کو کافی سراہا جارہا ہے۔
