اقبال انصاری نے کہا کہ اس مقدمے میں مجھے فیصلے کا انتظار نہیں ہے جو کچھ کریں گے رام للا کریں گے، مجھے رام للا پر بھروسہ ہے وہ سب دیکھ رہے ہیں۔
انہوں نے کہا کہ یہ معاملہ ختم ہونا چاہیے کیوں کہ ایودھیا دھرم کی نگری ہے، ہمارے ملک میں ہندو مسلم کا کوئی مسئلہ نہ رہے۔ہم امن چاہتے ہیں۔ اس لیے اس معاملہ کو ختم ہونا چاہیے۔کیوں کہ اس مقدمے میں ملزمین زیادہ تر اس دنیا میں نہیں ہیں اور جو زندہ ہیں وہ بے حد بزرگ ہیں۔
انہوں نے مزید کہا کہ جو کورٹ کا فیصلہ ہوگا ہم اس کو تسلیم کریں گے، کیوں کہ تمام ثبوت سی بی آئی کے پاس ہیں۔ جو بھی فیصلہ ہے وہ بھگوان رام پر چھوڑ دیا ہے کیوں کہ ہم امن چاہتے ہیں، ایودھیا ہندو مسلم سیکھ عیسائی کی نگری ہے۔
واضح رہے کہ سی بی آئی کی خصوصی عدالت بابری مسجد انہدامی کیس میں 49 لوگوں پر اپنا فیصلہ سنانے والی ہے حالانکہ 17 افراد کا پہلے ہی انتقال ہوچکا ہے۔ 32 میں سے 26 ملزمین عدالت میں موجود ہیں۔
