کانگریس پارٹی کے سینئر رہنما سلمان خورشید نے ای ٹی وی بھارت سے خاص بات چیت کرتے ہوئے کہا کہ 'ایک طویل مدت سے کانگریس پارٹی اترپردیش کا اقتدار حاصل کرنے میں ناکامیاب رہی ہے، تاہم اس وقت بھی خواتین اتر پردیش کی سیاست سے دور تھیں اور اب بھی ان کی حصہ داری نہ کے برابر نظر آ رہی ہیں۔
انہوں نے کہا کہ 'کانگریس نے ریاست کی سبھی خواتین کے مفاد میں فیصلہ لیتے ہوئے اتر پردیش اسمبلی انتخابات میں 40 فیصد ٹکٹ خواتین امیدواروں کو دے گی۔'
انہوں نے پارٹی کے اس فیصلے کی تعریف کرتے ہوئے کہا کہ اب یوپی میں خواتین اقتدار میں آئیں گی اور خواتین کے ساتھ ساتھ کانگریس بھی حکومت میں آئے گی۔
انہوں نے کہا کہ 'ریاست میں متعدد مسائل ہیں مثلا جرائم، بے روزگاری، مہنگائی، عدم مساوات، ذات پات اور تعصب وغیرہ لیکن ان تمام مسائل میں خواتین کو سب سے زیادہ جھیلنا پڑتا ہے اور ان سارے مسائل میں خواتین سب سے زیادہ ہدف بنتی ہیں۔ یہی وجہ ہے کہ کانگریس پارٹی نے فیصلہ کیا ہے کہ خواتین کی سیاست میں حصہ داری ہونی چاہیے۔'
یہ بھی پڑھیں: UP Assembly Election: کانگریس کا 40 فیصد ٹکٹ خواتین کو دینے کا اعلان
سلمان خورشید نے کہا کہ 'اترپردیش میں کانگریس پارٹی کی جانب سے ابھی تک وزیر اعلی کا کوئی چہرہ نہیں ہے تاہم اس حوالے سے جلد ہی اعلان کیا جائے گا۔'
