اترپردیش کی دارالحکومت لکھنؤ میں واقع مسلم مسافرخانہ بدحالی کا شکار ہے۔ چارباغ ریلوے اسٹیشن و بس اسٹیشن کے قریب یہ مسافر خانہ غریب و بے سہاروں کے لیے ایک امید ہے۔ لیکن بدقسمتی سے غریب مسافروں کو پناہ دینے اور انہیں کم قیمت میں عارضی قیام کی سہولت فراہم کرنے والا یہ مسافر خانہ خستہ حالت میں ہے۔
ای ٹی وی بھارت نے دو برسوں کے دوران کئی خبریں کرکے ذمہ داران سے بات چیت کی۔ اس کے بعد یوپی اسٹیٹ حج کمیٹی نے ایک کروڑ 17 لاکھ 78 ہزار روپے عمارت کے رنگ و روغن، بجلی بیت الخلا، صاف پانی اور دیگر کاموں کے لیے جاری کر دیا ہے۔ اس میں سے 58 لاکھ 89 ہزار روپے اتر پردیش وکاس نگم کو پہلے ہی جاری کر دیا گیا تھا تاکہ وہ ٹینڈر نکال کر کام شروع کروا سکیں۔
اس کے بعد کورونا وبا کی وجہ سے یہ کام کئی ماہ تک رکا رہا اور اب دوبارہ شروع ہو گیا ہے۔ لکھنؤ کے مسلم مسافر خانہ کی سنگ بنیاد 2 نومبر 1976 میں مولانا سید ابو الحسن علی ندوی نے رکھی۔
مسافر خانہ کے اراکین سید اطہر حسین، ظہیر حسین، مقبول احمد لاہوری اور دیگر ممبران تھے، جنہوں نے اس کے تعمیراتی کام کے لیے روپے دیے تھے۔ اس مسافر خانہ کی بنیاد کا اصل مقصد بیت اللہ کے مقدس سفر پر جانے والے عازمین حج کے لیے تھا کیونکہ اس وقت دارالحکومت لکھنؤ میں حج ہاؤس نہیں تھا لہذا جو بھی حاجی سفر کے آتے تھے، انہیں مسافر خانہ میں ہی قیام کروایا جاتا تھا۔
اس کے بعد یہیں سے حاجیوں کو ایئرپورٹ کے لئے روانہ کیا جاتا تھا۔ مسافر خانہ میں چار بڑے حال ہیں، جن میں 93 بیڈ ہیں۔ اس کے علاوہ یہاں پر کمرے بھی ہیں۔ ہال میں رکنے کے لئے ایک دن کا کرایا 80 روپے اور کمرے کا کرایا 100 روپے ہے۔ یہاں ہر روز 150-200 مسافر قیام کرنے کے لیے مختلف علاقوں سے آتے ہیں۔ کورونا وبا کے مد نظر ابھی بہت کم مسافر آ رہے ہیں۔
ای ٹی وی بھارت کو یہ بھی جانکاری حاصل ہوئی ہے کہ وقف وکاس نگم مسافر خانہ میں ایک اور منزل بنانا چاہتی ہے، جس میں بڑے ہوٹلوں کی طرح تمام سہولیات فراہم ہوں۔ مسافر خانہ کے مرمت کا کام پورا ہونے کے بعد مسافر خانہ میں رکنے کے لئے 'آن لائن سسٹم' کر دیا جائے گا تاکہ وہاں کے ملازمین کسی مسافر کے ساتھ ناانصافی نہ کر پائیں۔
مزید پڑھیں:
کولکاتا: نعمت اللہ شاہ مسجد، مذہبی رواداری کا گہوارہ
مسافر خانہ میں کام شروع ہو چکا ہے لیکن 'کچھوا چال' سے۔ نام نہ بتانے کی شرط پر وہاں کے ایک شخص نے بتایا کہ "پوری عمارت بالکل کمزور ہو گئی ہے، جس وجہ سے ہم لوگ احتیاط سے توڑ پھوڑ کر رہے ہیں، لیکن جو ذمہ دار ہیں، انہیں یہی نہیں معلوم کہ ٹھیکیدار سے کیا کام کرانا ہے؟"
