آب وہواو ماحولیات کے ماہرین نے صاف کیا ہے کہ آتش بازی کی آلودگی سے پورا اترپردیش اسماگ کی زد میں ہے۔ اس دوران میرٹھ، آگرہ، کانپور، لکھنؤ پریاگ راج اور وارانسی کی ائیر کوالٹی انڈکس(اے کیو آئی) بے قابو ہوکر اب تک کے سب سے اونچی سطح پر پہنچ گیا۔
دارالحکومت لکھنؤبھی دھندھ کی گرفت میں ہے۔ سنیچر کو لکھنؤ کا اے کیو آئی 422 ریکارڈ کیا گیا تھا جو اتوار کو کم ہوکر 400 رہ گیا۔ حالانکہ یہ بھی خطرناک زمرے میں آتا ہے۔
دارالحکومت میں سورج دن بھر بادلوں سے آنکھ مچولی کھیلتا رہا۔ پیر کو بھی یہی حالت بدستور قائم ہے۔ محکمہ موسمیات کے مطابق تین۔چار دنوں تک یہی حالات رہنے کے آثار ہیں۔ اب تیز ہوا چلنے کے بعد ہی حالات میں کچھ بہتری آسکتی ہے۔ لکھنؤ میونسپل کارپوریشن آلودگی کو کم کرنے کے لئے درختوں پر پانی کا چھڑکاؤ کررہا ہے۔
ریاستی حکومت نے پہلے ہی دارالحکومت میں تعمیراتی کاموں کو بند کرادیا ہے۔تعمیراتی کام کرا رہے افراد کو ہدایت دی گئی ہے کہ وہ تعمیرائی سائٹ کو ڈھک کر کام کریں۔
