اترپریش کے ضلع بریلی میں رہنے والے فضل الدین نامی شخص پیشے کے اعتبار سے ای رکشا ڈرائیور تھے، منگل کے روز اس کا بِتھری چینپور پولیس اسٹیشن کے حلقہ نریاول میں پیٹ پیٹ کر قتل کر دیا گیا۔
فضل الدین کا قصور صرف اتنا تھا کہ اُس کا ای رکشا ایک بائک سے ٹکرا گیا تھا۔ بائک کے مالک نے فضل الدین کو معمولی بات پر اس قدر پیٹا کہ اُس کی موت ہو گئی۔ بہرحال پولس نے قتل کے الزام میں تین ملزمان کو گرفتار کر لیا ہے۔
اس بہیمانہ قتل کی واردات کے بعد مقامی لوگوں نے سڑک پر جام لگا دیا۔ اطلاع ملنے کے بعد پولس بھی موقع واردات پر پہنچ گئی۔
پولس نے جام کُھلوانے کی کوشش کی تو ہجوم نے پولیس کے خلاف ہنگامہ کیا۔ پولیس اور مقتول کے اہلِ خانہ کے مابین گفتگو کے بعد پولیس نے طے کیا کہ جن ملزمان کے خلاف تحریر دی جائے گی اُنہیں گرفتار کیا جائے گا۔
یہاں بتا دیں موضع نریاول کے رہنے والے ملزم ذاکر حسین عرف مُنّے انصاری اور اُن کے بیٹے ناظم انصاری کے علاوہ ایک دیگر فرد کے خلاف قتل کی سنگین دفعات کے تحت مقدمہ درج کیا گیا ہے۔
مُنّے انصاری سیاسی طور پر سنہ 2005 میں سماجوادی پارٹی کے ٹکٹ پر ضلع پنچایت کے رُکن بھی منتخب ہو چکے ہیں۔ اب وہ ایم آئی ایم کے کارکن ہیں اور اپنے علاقے سے انتخابی میدان میں ہیں۔
