کورونا وبا کی دوسری لہر کے دوران علی گڑھ مسلم یونیورسٹی کے تقریبا 60 تدریسی و غیر تدریسی ملازمین کی اموات ہو چکی ہیں۔ جس میں موجودہ، ریٹائرڈ اور اسکول ملازمین بھی شامل ہیں۔ سبھی اموات صرف کورونا کے سبب ہوئی ہیں، یہ کہنا مشکل ہے لیکن اطلاع کے مطابق زیادہ تر اموات کورونا کے سبب ہوئی ہیں۔
علی گڑھ مسلم یونیورسٹی میں غم کے بادل چھائے ہوئے ہیں، صدمے کا ماحول ہے۔ اس سے قبل اتنی بڑی تعداد میں اے ایم یو ملازمین کی اموات کبھی نہیں ہوئی، جس کے سبب علیگ برادری سمیت انتظامیہ صدمے میں ہے۔
مرحومین کے ایصال ثواب اور مغفرت کے لئے اے ایم یو ملازمین نے علی گڑھ تھانہ کوارسی کے علاقے میں موجود ایک شادی گھر میں کورونا وبا کی رہنما ہدایات کے مطابق قرآن خوانی کی اور دعا مغفرت کی۔
اے ایم یو جواہر لال نہرو میڈیکل کالج کے ملازم محمد شاداب نے بتایا کہ گزشتہ کچھ روز سے کورونا وبا کے سبب اے ایم یو تدریسی و غیر تدریسی ملازمین کے انتقال کی خبریں آ رہی تھیں۔ مرحومین کے ایصال ثواب کے لئے یہاں قرآن خوانی کی گئی اور جتنے بھی دنیا سے رخصت ہو چکے ہیں، ان سبھی کے لیے دعائے مغفرت کی گئی۔
