علیگڑھ: جہاں ایک جانب ضلع علی گڑھ میں اسمارٹ سٹی کے تحت زور و شور سے کام چل رہا ہے۔ تمام خاص چوراہوں اور سڑکوں کی کشادہ کاری و مرمت جاری ہے۔ ٹریفک سگنل، فٹ پاتھ، ڈیوائیڈر، رنگ و روغن، روشنی وغیرہ کی جا رہی ہے۔ وہیں علی گڑھ عید گاہ کے قریب ایک مسلم اکثریتی علاقہ ایسا بھی ہے جہاں لوگ پینے کے پانی کے لیے پریشان ہیں۔ ان علاقوں میں یا تو پانی آتا ہی نہیں اور اگر آبھی جاتا ہے تو اتنا گندہ ہوتا ہے کہ پینے کے قابل نہیں ہوتا۔ Water Shortage in Aligarh
پینے کا پانی نہ ملنے پر مقامی لوگ بری طرح متاثر ہیں۔ لوگوں کا کہنا ہے کہ گزشتہ کئی ماہ سے اس علاقے میں پانی کی شدید قلت ہے۔ صبح شام کسی بھی وقت کچھ دیر کے لیے پانی آتا ہے اور وہ بھی گندہ ہوتا ہے۔ مقامی لوگوں نے بتایا کہ انہوں نے بلدیہ کے عہدیداران کو بھی بُلا کر یہاں پر پانی کی کمی اور گندہ پانی دکھایا تاہم ابھی تک کوئی ٹھوس قدم نہیں اٹھایا گیا۔
مقامی لوگوں نے بتایا پورا رمضان کا مہینہ اسی طرح گزر گیا۔ صرف عید کے روز اچھا پانی سپلائی کیا گیا۔ پانی کی کمی کی شکایت کئی مرتبہ کی جاچکی ہیں لیکن ابھی تک کسی بھی طرح کی کارروائی نہیں ہوئی۔ مقامی لوگوں نے بتایا شاید کچھ جگہ پانی کی پائپ لائن میں لیکیج ہونے کی وجہ سے علاقے میں پانی نہیں آتا اور جو آتا بھی ہے تو وہ گندہ پانی آتا ہے ایسا لگتا ہے کہ نالے کا پانی مل کر آ رہا ہے جس کو اگر برتن میں لینے کے بعد ہلایا جاتا ہے تو اس میں جھاگ پیدا ہوتی ہے اور پانی زرد رنگ کا ہوتا ہے۔
مقامی لوگ پینے کا پانی خرید کر گزارہ کرنے پر مجبور ہیں اور روزمرہ کی دیگر ضروریات کے لیے علاقے کے گھروں میں لگے بورویل سے پانی بھر کر کسی طرح سے گزارا کر رہے ہیں۔ وہیں کچھ مقامی لوگوں کا حکومت اور بلدیہ کے اعلی عہدیدار پر یہ بھی الزام ہے کہ مسلم اکثریتی علاقے ہونے کی وجہ سے علاقے میں پانی نہیں دیا جارہا ہے۔ لوگوں نے کہا کہ اگر علیگڑھ واٹر کارپوریشن اور میونسپل کارپوریشن کے ملازمین علاقے میں موجود پانی کی پائپ لائنس کے لیکیج ڈھونڈ کر ان کی مرمت کردیں تو پانی کی سپلائی کے ساتھ پہلے کی طرح صاف پانی بھی آنا شروع ہو جائے گا۔
