اردو کے مشہور شاعر پدم شری ڈاکٹر بشیر بدر جو ان دنوں بھوپال مدھیہ پردیش میں رہتے ہیں، نے علی گڑھ مسلم یونیورسٹی سے 1973 میں پی ایچ ڈی مکمل کی تھی۔ اب انہیں پی ایچ ڈی کی ڈگری تفویض ہوچکی ہے۔
ڈاکٹر بشیر بدر اور ان کے اہل خانہ پی ایچ ڈی کی ڈگری کو حاصل کرنے کے لئے بڑے پرجوش تھے۔ یونیورسٹی کی جانب سے انہیں ڈگری مہیا کر دی گئی ہے، ڈگری موصول ہونے پر انہوں نے مسرت کا اظہار کیا ہے۔
واضح رہے کہ ڈاکٹر بشیر بدر نے پی ایچ ڈی سے قبل علی گڑھ مسلم یونیورسٹی سے ہی ایم اے کی ڈگری 1969 میں حاصل کی تھی۔ ڈاکٹر بشیر بدر کو ساہتیہ اکیڈمی ایوارڈ اور پدم شری سے بھی نوازا جا چکا ہے۔
