اتر پردیش میں ضلع پنچایت، گرام پنچایت اور علاقائی پنچایت کے انتخابات کے نتائج آنے کے بعد سے ضلع پنچایت کے صدر کے عہدے کے لیے انتخابات کی سرگرمیاں زور و شور سے جاری ہیں۔
سماجوادی پارٹی نے ضلع بدایوں میں اپنے امیدوار کے طور پر سنیتا شاکیہ کو پنچایت صدر کے عہدے کے لیے امیدوار بناتے ہوئے 26 تاریخ کو ان کا پرچہ داخل کرایا۔ سنیتا شاکیہ حال ہی میں بہوجن سماج پارٹی کو چھوڑ کر سماجوادی پارٹی میں شامل ہونے والے دو مرتبہ کے سابق رکن اسمبلی سنود کمار شاکیہ کی اہلیہ اور ضلع پنچایت کی رکن ہیں۔
دوسری جانب بی جے پی نے سابق ایم ایل سی نریندر یادو کی اہلیہ ورشہ یادو پر ضلع پنچایت میں صدر کے عہدے کا دعویٰ کیا اور ان کا پرچہ نامزدگی درج کرایا ہے۔
آپ کو بتا دیں کہ بدایوں میں ضلع پنچایت کی 51 سیٹوں میں سے 26 سیٹیں او بی سی، 11 سیٹیں شیڈول کاسٹ اور 14 سیٹیں جنرل کیٹیگری کے افراد کے پاس ہیں، وہیں آزاد اراکین کی تعداد 15 ہے۔
نامزدگی کے موقع پر سماجوادی پارٹی کے ضلعی صدر پریم پال سنگھ کا کہنا تھا کہ سبھی کارکنان، رہنماء اور پارٹی کے عہدے داروں کی بات کا خیال رکھتے ہوئے سنیتا شاکیہ کو ضلع پنچایت صدر کے عہدے کا امیدوار بنایا گیا ہے
واضح رہے کہ 51 میں سے 26 ووٹ حاصل کرنے والا امیدوار فاتح ہوگا۔ 26 جون کو پرچہ نامزدگی کی آخری تاریخ اور 29 جون کو نام واپس لیے جانے کی آخری تاریخ ہے۔ 3 جولائی کو تین بجے تک ووٹنگ ہوگی اس کے بعد گنتی اور نتائج کا اعلان کر دیا جائے گا۔
