سماجوادی پارٹی کے رکن پارلیمان اعظم خاں، اہلیہ تزئین فاطمہ اور بیٹے عبداللہ اعظم کو عدالت نے آج ایک بڑی راحت دی ہے۔ آپ کو بتا دیں کہ گذشتہ دو دن پہلے استغاثہ کی جانب سے اعظم خاں اور ان کے اہل خانہ کو 10 دن کی پولیس ریمانڈ پر لینے کے لئے عرضی لگائی گئی تھی۔ جسے آج عدالت نے خارج کر دیا ہے۔
اس متعلق جانکاری دیتے ہوئے اعظم خان کے دفاعی وکیل خلیل اللہ خاں نے کہا کہ استغاثہ کی جانب سے اعظم خان، اہلیہ تزئین فاطمہ اور بیٹے عبداللہ اعظم کے لئے 10 دن کی پولیس کسٹڈی ریمانڈ مانگی گئی تھی، جسے رامپور کی اے ڈی جے 9 کورٹ نے خارج کر دیا ہے۔
واضح رہے کہ اعظم خاں اپنے اہل خانہ کے ساتھ 26 فروری سے عدالتی تحویل میں ہیں۔ پہلے دن وہ رامپور جیل میں رہے۔ اس کے بعد ان کو سیتاپور جیل منتقل کر دیا گیا۔ تب سے ابھی تک وہ سیتاپور جیل میں ہی قید ہیں۔ آج اس معاملے کی سماعت ویڈیو کانفرنسنگ کے ذریعے کی گئی۔
