ریاست اترپردیش کے شہر بہرائچ میں کوروناوائرس سے بچاؤ اور ملک گیر پیمانے پر لاک ڈاؤن ہے، اس لاک ڈاؤن کی وجہ سے غریب اور مزدور طبقہ جو روزانہ مزدوری کرتے ہوئے روزہ مرہ کی ضروریات کو پورا کرتا ہے، انھیں بے حد مشکلات کا سامنا کرنا پڑ رہا ہے۔
ایسے میں ضلع بہرائچ میں حضرت سید سالار مسعود غازی رحمۃاللہ کی انتظامیہ کمیٹی نے ان غریب افراد کی مدد کا بیڑہ اٹھایا ہے۔
کمیٹی نے ان غریب مزدور لوگوں میں ضروری اشیا جیسے چاول،دال سبزی وغیرہ تقسیم کیا ہے۔ موجودہ حالات میں کورونا وائرس جیسی خطرناک وبا سے عوام میں خوف کا ماحول ہے تو دوسری جانب ضروری اشیاء چاول، دال، سبزی کی قیمت میں بھی اضافہ ہوا ہے۔
ایسے میں وہ طبقہ جو یومیہ مزدوری کرکے اپنی روزی روٹی کا انتظام کرتا ہے، وہ اب کام پر نہیں جاسکتا، جس کی وجہ سے ضروری اشیا کی خریداری کے لیے ان کے پاس رقم نہیں ہے۔
ایسے مشکل وقت میں درگاہ انتظامیہ کمیٹی کے صدر سید شمشاد احمد ایڈووکیٹ کی صدارت میں بہرائچ کے مختلف علاقوں میں مفت راش کٹ تقسیم کیا گیا ہے، اور درگاہ احاطے میں موجود غرباء کو کھانا کھلانے کا کام کیا جا رہا ہے-
اس موقع پر عبدالرحمن عرف بچے بھارتی، دلشاد احمد ایڈووکیٹ ،عظمت اللہ گردارو، سید علی بابا، ماسٹر محمد اسحاق عرف مجن، وسیم مکرانی، مقصود رائینی، محمد عارف اور محفوظ الرحمن کے علاوہ تمام اراکین و ملازمین موجود رہے۔
