کورونا وائرس کی وجہ سے متعدد مہینوں سے نافذ لاک ڈاؤن کے سبب ٹرینیں بند کر دی گئی تھیں لیکن جیسے جیسے ملک بھر میں کورونا کے کیسز کم ہوتے گئے آہستہ آہستہ لاک ڈاؤن میں نرمی برتی گئی۔
کورونا کے کیسز کم ہونے کے بعد کئی ٹرینوں کو بھی کھول دیا گیا لیکن ابھی تک لوکل ٹرینوں کو شروع نہیں کیا گیا ہے۔ اس کی وجہ سے عوام کو سفر کرنے میں کافی پریشانیوں کا سامنا کرنا پڑ رہا ہے۔
اگر بات کی جائے ریاست اتر پردیش کے ضلع مرادآباد کی تو مرادآباد میں دودھ کا کاروبار کرنے والوں کو ٹرینوں کے ذریعہ دودھ کو ایک شہر سے دوسرے شہر لے جانے میں کافی پریشانیوں کا سامنا کرنا پڑ رہا ہے۔
یہ بھی پڑھیں: بھارتی ریلوے نے بنائی اے سی اکانومی کوچ، جانیں کیا ہے خاص
ضلع مرادآباد کے سینکڑوں دودھ کا کاروبار کرنے والے افراد ٹرین کے ذریعہ ہی دودھ لےکر ریاست اترا کھنڈ جاتے ہیں۔ لیکن لوکل ٹرینیں بند ہونے کی وجہ سے ان کاروباریوں کو بسز یا اپنی سواری سے دودھ لیکر دوسرے شہر لے جانا پڑتا ہے جس کا خرچہ زیادہ پڑتا ہے۔ اس کی وجہ سے کوئی بچت نہیں ہو پاتی۔
دودھ کا کاروبار کرنے والے عبد السلیم نے ای ٹی وی بھارت کے ذریعہ حکومت سے مطالبہ کیا کہ 'لوکل ٹرینوں کو جلد از جلد چلائی جائیں۔'
