ریاست اترپردیش کے ضلع بریلی میں سماجوادی پارٹی کے اقلیتی سیل کے ضلع صدر محمد اسلم خان نے قدآور رہنما محمد اعظم خاں کی رہائی کے لیے پارٹی دفتر سے ضلع کلکٹریٹ تک پیدل مارچ نکالا۔
اس دوران پارٹی عہدے داران اور کارکنان نے گورنر کے نام ایک میمورنڈم ضلع انتظامیہ کے سپرد کرکے حکومت اتر پردیش سے مطالبہ کیا کہ محمد اعظم خاں کو جلد از جلد رہا کیا جائے۔
تقریباً ایک برس سے زائد وقت سے سیتاپور جیل میں قید سماجوادی پارٹی کے قدآور رہنما محمد اعظم خاں کی رہائی کے لیے آوازیں بلند ہونے لگی ہیں۔ بریلی میں ”میرا حق فاؤنڈیشن“ کی سربراہ رفیعہ شبنم نے سب سے پہلے محمد اعظم خاں کی رہائی کے لیے مہم چلائی تھی، جس میں اُنہوں نے ضلع انتظامیہ کے توسط سے حکومت اترپردیش کے نام ایک میمورنڈم ارسال کیا تھا۔
یہ بھی پڑھیں: جنتر منتر نعرہ معاملہ: اشونی اپادھیائے سمیت 6 افراد پولیس حراست میں
اس کے بعد تمام سماجی تنظیموں نے بھی محمد اعظم خاں کی رہائی کے لیے مارچ نکالا اور احتجاجی مظاہرہ کیا۔ طویل عرصہ سے محمد اعظم خاں کی رہائی کے معاملہ میں خاموشی اختیار کرنے یا اس معاملہ سے فاصلہ بنائے رکھنے والی سماجوادی پارٹی کی اقلیتی سیل نے محمد اعظم خاں کی رہائی کے لیے پیدل مارچ نکالا۔
اقلیتی سیل کے ضلع صدر محمد اسلم خان کی قیادت میں نکالے گئے اس مارچ میں شامل تمام عہدے داران اور کارکنان نے ضلع کلکٹریٹ پہنچ کر احتجاجی مظاہرہ کیا اور محمد اعظم خاں کو پیرول پر رہا کرنے کا مطالبہ بھی کیا۔
