تقریبا ڈیڑھ برس قبل وارانسی ریلوے اسٹیشن سے اردو زبان میں لکھے گئے 'وارانسی' بورڈ کو ہٹادیا گیا ہے، جس کو لیکر آج بنارس کے سماجی کارکنان کے ایک وفد نے اسٹیشن ماسٹر سے ملاقات کر دوبارہ اردو زبان والے بورڈ کو لگانے کا مطالبہ کیا۔
وفد کے نمائندہ منیش شرما نے اسٹیشن ماسٹر سے کہا کہ اردو زبان کو اتر پردیش میں دوسری سرکاری زبان کا درجہ حاصل ہے اسے ہٹانا غیر آئینی و غیر قانونی ہے۔
گزشتہ ڈیڑھ برس سےکینٹ (وارانسی) ریلوے اسٹیشن پر اردو زبان والے بورڈ کو کیوں نہیں لگایا جا رہا ہے انتظامیہ کو جواب دینا چاہیے۔
اسٹیشن انتظامیہ کو یہ بھی یاد دلایا کہ یہ صرف ایک بورڈ ہی نہیں بلکہ اردو زبان ہماری مشترکہ تہذیب کی وراثت کا حصہ ہے اور اس سے گہرا لگاؤ ہے ایسے میں ہمارے مطالبات کو سنجیدگی سے لیا جائے اور فوراً بورڈ لگایا جائے۔
اسٹیشن ماسٹر نے وفد کوجواب دیتے ہوئے کہا کہ ریلوے اسٹیشن سے اردو بورڈ تعمیری کام کی وجہ سے ہٹایا گیا ہے جس پر وفد نے اعتراض کیا کہ ڈیڑھ برس گزر گئے اور کام بھی مکمل ہوگیا اس کے باوجود کیوں نہیں لگا؟ جس پر اسٹیشن ماسٹر نے یقین دہانی کرائی ہے کہ آئندہ 15 دنوں میں بورڈ دوبارہ لگا دیا جائے گا۔
اس وفد میں شامل منیش شرما، عابد شیخ، شہزادی بانو سمیت متعدد افراد موجود رہے۔
