کورونا وائرس کے پھیلاؤ پر قابو پانے کے لیے دارالحکومت دہلی میں دہلی اور غازی آباد کے درمیان سرحد کو پوری طرح سے سیل کر دیا گیا ہے اور اس کے علاوہ شہر میں ٹریفک کی نقل و حرکت پر پابندی عائد کرنے کی نگرانی سخت کردی ہے۔
صرف ضروری خدمات انجام دینے والے افراد اور پاس رکھنے والے افراد کو ہی سرحد پار سے سفر کرنے کی اجازت ہوگی۔
غازی آباد کے ضلعی مجسٹریٹ اجے شنکر پانڈے نے 20 اپریل کو جاری کردہ ایک آرڈر میں کہا 'یہ فیصلہ دہلی سے آنے والے 6 افراد کے کورونا وائرس کے مثبت ٹیسٹ کے بعد لیا گیا ہے'۔
واضح رہے کہ یہ حکم نیشنل ڈیزاسٹر ایکٹ 2005 کے تحت جاری کیا گیا تھا اور فوراً اسے نافذ کیا گیا۔
انتظامیہ نے کہا 'صحت کے کارکنان میڈیا افراد اور ضروری خدمات میں شامل لوگوں کو سرحد پار سفر کرنے کی اجازت دی جائے گی، اس کے علاوہ پاس رکھنے والے افراد کو بھی سفر کی اجازت دی جائے گی'۔
انتظامیہ نے مزید کہا 'ضروری خدمات کی فراہمی میں ملوث لوگوں کے پاس 'پاس' ہونا لازمی ہے'۔
اتر پردیش میں منگل کو آگرہ میں 65 اور رائے بریلی میں 33 کووڈ-19 کیسز سمیت اب ریاست میں کوورونا وائرس کے تازہ معاملوں کی تعداد 153 تک پہنچ گئی ہے۔
اس کے علاوہ ریاست میں مجموعی طور پر 52 اضلاع میں کووڈ-19 کیسز کی کل تعداد 1 ہزار 337 تک پہنچ گئی ہے۔
