مسجد میں نماز کی پابندی کے معاملے میں جمعرات کو ضلع کے 27 علما نے ضلع مجسٹریٹ سے ملاقات کر کے جمعہ سے نماز کی اجازت دینے کا مطالبہ کیا۔
ضلع کے قاضی عبد المصطفی صدیقی حشمتی کی قیادت میں اس وفد نے ڈی ایم کے نمائندے کو میمورنڈم دے کر بے قصوروں پر ہو رہی بے جا کارروائی کو روکنے کا بھی مطالبہ کیا۔
واضح رہے کہ صبح تقریبا 11 بجے 27 علما کے وفد نے ڈی ایم دفتر پہنچ کر میمورنڈم دیا۔ ڈی ایم کی غیر موجودگی میں وفد نے ایکسٹرا مجسٹریٹ اس پی وشوکرما سے گفتگو کی۔
اس موقع پر قاضی عبدالمصطفی صدیقی حشمتی نے کہا کہ ہم نے مسجد میں جمعہ کو نماز ادا کرنے کی اجازت دینے کا مطالبہ کیا ہے۔ اور بے قصوروں پر غیر قانونی کاروائی نہ کیے جانے کا مطالبہ بھی کیا ہے۔
انہوں نے بتایا کہ ڈی ایم کے نمائندے نے یقین دہانی کرائی ہے کہ وہ تمام رپورٹ ڈی ایم کو بھیج دیں گے۔ انہوں نے کہا کہ مسجد میں نماز شروع ہونے سے عوام میں اعتماد پیدا ہوگا۔
انہوں نے مزید کہا کہ جب مسجد کے تمام دستاویز موجود ہیں۔ اس کے باوجود نماز کا نہ ہونا عجب ہے۔ اگر مسجد میں جلد از جلد نماز شروع نہیں ہوئی تو وہ وزیراعظم اور صدر جمہوریہ تک اپنے مطالبات لے کر جائیں گے۔
