اترپردیش کے ضلع مظفر نگر کے محلہ رحمت نگر میں واقع مدرسہ خدیجۃ الکبریٰ للبنات میں ایک اجلاس کا اہتمام کیا گیا جس کی صدارت شہر صدر حافظ محمد اکرام نے کی، جبکہ مہمان خصوصی کے طور پر قاری ذاکر حسین سیکریٹری جمعیت علما مغربی اتر پردیش کو بلایا گیا تھا۔
اس میٹنگ میں علمائے دین کی جانب سے نکاح سے متعلق کئی اہم فیصلہ لیا گیا جس میں کہا گیا کہ 'ناچ گانا، ڈی جے اور جہیز کے مطالبات والے شادیوں میں ہم لوگ شریک نہیں ہوں گے اور نہ ہی نکاح پڑھائیں گے۔
علما نے کہا کہ شریعت کے حساب سے جو لڑکی کا حق ہے اسے ادا کیا جائے نہ کہ جہیز دیا جائے۔
وہیں، اس میٹنگ میں حضرت مولانا سید ولی رحمانی صاحب جنرل سیکریٹری آل انڈیا مسلم پرسنل لا بورڈ کو تعزیت پیش کر ایصال ثواب بھی کیا گیا اور یہ طے کیا گیا کہ قرآن کریم کی تعلیم کو عام کرنے کے لیے جگہ جگہ مکاتب کا قیام کیا جائے۔
رمضان المبارک کے سلسلے میں علماء کرام نے مساجد کے آئمہ سے اپیل کی کہ رمضان المبارک کے شروع ہونے سے قبل ہی عوام کے درمیان جا کر انہیں رمضان المبارک کی اہمیت بتائیں اور صحیح طریقے سے اس ماہ مبارک کو گزارنے پر آمادہ کریں۔
