بارہ بنکی: کھیت میں ملی لڑکی کی لاش

اتر پردیش کے بارہ بنکی ضلع کے زیدپور تھانہ حلقے کے بی بی پور گاؤں سے ایک 22 برس کی لڑکی لاش برآمد ہوئی ہے۔ لڑکی کی لاش ملنے سے علاقے میں سنسنی پھیل گئی ہے۔ لڑکی کی لاش ملنے کے بعد افواہوں کا بازار گرم ہے۔ لڑکی کے ساتھ جنسی زیادتی کے بعد قتل کا خدشہ بھی ظاہر کیا جا رہا ہے۔ فی الحال پولیس نے لاش کو پوسٹ مارٹم کے لئے بھیج دیا ہے۔

ذرائع کے مطابق زیدپور تھانہ حلقے کے بی بی پور گاؤں کے ایک کھیت سے 22 سالہ لڑکی کی لاش اتوار کی شام کو برآمد ہوئی۔ لڑکی کی شناخت کوٹھی تھانہ حلقے کی باشندہ کے طور پر ہوئی ہے۔

خدشہ ظاہر کیا جا رہا ہے کہ لڑکی کے ساتھ جنسی زیادتی کے بعد گلا گھونٹ کر قتل کیا گیا ہے۔ ذرائع کے مطابق لڑکی اتوار کی صبح 9 بجے اپنے گھر سے نکلی تھی۔ اس کے بعد اس کی لاش کھیت سے ملی ہے۔

پولیس سپرنٹنڈنٹ یمنا پرساد نے موقع کا معائنہ کر کے لاش کو پوسٹ مارٹم کے لئے بھیج دیا ہے۔ لڑکی کا دماغی توازن بھی خراب بتایا جا رہا ہے۔

فی الحال پولیس جانچ میں مصروف ہے اور اس معاملے میں متعدد ٹیمیں لگائی گئی ہیں۔ مہلوک شدہ لڑکی کے کنبے کے گھر سیاسی رہنماؤں کا پہنچنا بھی شروع ہو گیا ہے۔