کانگریس نے بارہ بنکی میں ایک دلت لڑکی کے قتل پر افسوس کا اظہار کرتے ہوئے مقتولہ کے اہل خانہ کو فوری طور پر 50 لاکھ روپئے معاوضہ دینے اور قصورواروں کے خلاف سخت کاروائی کرنے کا حکومت سے مطالبہ کیا۔
ریاستی کانگریس کمیٹی کے صدر اجئے کمار للو کی ہدایت پر کانگریس کے وفد نے سدھور بلاک میں واقع مقتولہ کے گاؤں پہونچ کر گھر والوں کو پرسہ دیا۔ وفد کی قیادت سابق ریاستی وزیر آر کے چودھری نے کی۔ وفد نے دماغی طور پر معذور لڑکی کے ساتھ کی گئی بربریت کی سخت الفاظ میں مذمت کی۔
اس سلسلہ میں آر کے چودھری اپنی رپورٹ ریاستی صدر کو دیں گے۔ انہوں نے کہا کہ بی جے پی حکومت میں جرائم کے واقعات میں دن بدن اضافہ ہو رہا ہے۔ بیٹی بچاؤ بیٹی پڑھاؤ کا نعرہ دینے والی بی جے پی حکومت لڑکیوں کو تحفظ فراہم کرنے میں ناکام ثابت ہو رہی ہے۔
انہوں نے کہا کہ 3 ماہ قبل بھی بارہ بنکی کے سیٹھ مؤ پپری گاؤں میں اسی طرح کی واردات پیش آئی تھی۔ انہوں نے اس بات کی بھی یقین دہانی کرائی ہے کہ کانگریس کی جانب سے متاثرہ خاندان کو انصاف دلانے کے لیے ہر ممکن کوشش کی جائے گی۔
واضح رہے کہ گزشتہ اتوار کو زید پور تھانہ حلقہ کے بی بی پور گاؤں میں سرسوں کے کھیت سے 22 سالہ معذور لڑکی کی لاش برآمد ہوئی تھی جس کی شناخت کوٹھی تھانہ حلقے کے کورہرا پوروا گاؤں کی ایک دلت لڑکی کے طور پر کی گئی تھی۔ اطلاعات کے مطابق لڑکی کے ساتھ اجتماعی جنسی زیادتی کے بعد گلا گھونٹ کر قتل کردیا گیا تھا۔ اس معاملہ میں تحقیقات جاری ہیں۔ واردات کے تین دن بعد بھی پولیس کو اس معاملہ میں کوئی کامیابی نہیں ملی ہے۔
