اتر پردیش میں پانچ مزید میڈیکل کالجوں اور میڈیکل انسٹی ٹیوٹ کی مولیکیولر لیب کو کورونا وائرس کی جانچ کرنے کے لیے انڈین کونسل آف میڈیکل ریسرچ 'آئی سی ایم آر' نے منظوری دے دی ہے۔ ان میں بریلی میں واقع آئی وی آر آئی بھی شامل ہے۔ جہاں تقریباً 200 لوگوں کی جانچ روزانہ ہونے کے امکانات ہیں۔
اس طرح اتر پردیش میں تمام لیبس میں روزانہ 475 لوگوں کی جانچ کرنا ممکن ہو جائےگا۔ اگر ملک کی بات کریں تو سرکاری 14 لیب میں اب روزانہ دو ہزار کورونا کے مشتبہ مریضوں کی جانچ ممکن ہوگی۔ اس کے علاوہ صرف ایک پرائیویٹ 'ڈاکٹر آر ایم ایل مہروترا' لیب بھی جانچ کے لیے مستند ہے۔
انڈین ویٹرےنری ریسرچ انسٹی ٹیوٹ میں اب کورونا وائرس کی جانچ کرانا ممکن ہو گیا ہے۔ حکومت کی جانب سے ڈی ایم کو ضروری ساز و سامان فراہم کرانے کے احکامات ملنے کے ساتھ ہی ڈی ایم، ایس ایس پی، سی ایم اور سی ڈی او نے آئی وی آر آئی جاکر ڈائریکٹر سے ملاقات کی ہے۔ ان افسران نے بی ایس ایل تھری لیب کا جائزہ بھی لیا ہے۔ ڈی ایم نے سی ایم او کو جانچ میں استعمال ہونے والا تمام ضروری ساز و سامان جلد ہی آئی وی آر آئی کو دستیاب کرانے کے احکامات دیئے ہیں۔
