اترپردیش میں ضلع مظفر نگر کے بگراج پور میڈیکل کالج میں آج اس وقت افراتفری پھیل گئی جب کورونا کے ایک مریض نے رات دیر گئے ہسپتال کی پانچویں منزل سے کود کر خودکشی کرلی۔
اطلاعات کے مطابق مظفر نگر کے نیو منڈی تھانہ علاقہ لالباغ گاندھی کالونی کا رہائشی راج کمار جس کی عمر 55 برس تھی کو کوویڈ ٹسٹ میں مثبت پائے جانے کے بعد 8 جنوری کو ہسپتال میں داخل کیا گیا تھا جبکہ آج اس نے ہسپتال کی پانچویں منزل سے چھلانگ لگا کر خودکشی کرلی۔
راج کمار کے بیٹے نے ہسپتال انتظامیہ پر لاپرواہی برتنے کا الزام عائد کرتے ہوئے بتایا کہ آج صبح 4 بجے مجھے ہسپتال سے فون آیا اور کہا گیا کہ میرے والد کی طبیعت خراب ہے لیکن ہسپتال پہنچنے کے بعد مجھے بتایا گیا کہ میرے والد نے خودکشی کرلی۔
وہیں ضلع ڈی ایم سیلوا کماری نے بتایا کہ کورونا سے متاثر مریض راج کمار نے ہسپتال کی پانچویں منزل سے کود کر خودکشی کرلی۔ انہوں نے بتایا کہ متوفی مریض کا اپنے کنبے کے ساتھ کچھ جھگڑا چل رہا تھا۔ اس معاملے میں مزید تحقیقات کی جارہی ہے۔
