اترپردیش میں آئندہ پنچایتی انتخابات منعقد کیے جائیں گے۔ اس سلسلہ میں مختلف پارٹیوں نے ابھی سے تیاری شروع کردی ہے۔ اس ضمن میں نوئیڈا کانگریس کمیٹی کے دفتر میں ایک اجلاس کا انعقاد کیا گیا جس میں گوتم بدھ نگر انچارج سنیل وشنوئی نے کارکنوں کو ہدایات دیتے ہوئے کہا کہ پنچایتی انتخابات میں کامیابی کے لئے اپنی پوری طاقت جھونک دیں۔
انہوں نے کہا کہ اس طرح یہ محنت اور تیاری آئندہ اسمبلی انتخابات میں بھی ہمارے لئے کارآمد ثابت ہوگی۔ سٹی صدر شہاب الدین نے جلسہ کی صدارت کرتے ہوئے کہا کہ اس وقت پورے اترپردیش میں یوگی اور بی جے پی سرکار سے عوام نالاں ہیں۔ عوام کے درمیان اپنی موجودگی درج کرانے کا یہ بہترین موقع ہے۔ پنچایتی انتخابات میں اپنی دعویداری کو مضبوط کرکے ہم آئندہ سال ہونے والے اسمبلی انتخابات کی بھی راہ ہموار کر سکتے ہیں۔ اس لیے زمینی سطح پر تمام کارکنان کو اپنی ذمہ داری نبھانی ہوگی۔
میٹنگ میں موجود عہدیداروں میں سابق میٹرو پولیٹن صدر مکیش یادو، اے آئی سی سی دنیش اوانا، اے آئی سی سی راجکمار بھارتی، پی سی سی پرومود شرما، پی سی سی ستیندر شرما، ریاستی جنرل سکریٹری اقلیتی لیاقت چودھری، ریاستی جنرل سکریٹری او بی سی فرے سنگھ نگر، ضلع یوتھ کانگریس کے صدر پرشوتم ناگر، اقلیتی شعبہ کے ضلع صدر دانش سیفی، جاوید خان، فیضان چودھری اور اشرف خان وغیرہ شامل تھے۔
