آل انڈیا آئیڈیل ٹیچرز ایسو سی ایشن کی جانب سے منعقد اس تقریب میں رامپور کے رضا پی جی کالج کے پرنسپل ڈاکٹر پی کے وارشنئے نے مہمان خصوصی کی حیثیت سے شرکت کی۔
اس موقع پر دانشوران قوم و ملت نے اساتذہ کے فرائض اور طلبا کے درمیان خدمات پر تفصیل سے روشنی ڈالتے ہوئے افتتاحی کلمات میں معلم کی بنیادی ذمے داریوں پر روشنی ڈالی۔
تقریب کے مہمان خصوصی رضا پی جی کالج کے پرنسپل ڈاکٹر پی کے وارشنئے نے اپنے خطاب میں کہا کہ 'معلم کو اپنی پہچان خود بنانی چاہئے۔ اللہ کے پیغمبر نے بھی استاد کی کافی اہمیت بتائی ہے۔'
آل انڈیا آئیڈیل کے ضلع سکریٹری زین العابدین عثمانی نے کہا کہ 'ٹیچرز ایسوسی ایشن جس کو عرف عام میں آئٹا بھی کہتے ہیں۔ اپنے مزاج کے اعتبار سے ایک منفرد تنظیم ہے۔ جس کا بنیادی مقصد اساتذہ کو ان کے فرائض کی یاد دہانی اور اپنی ذمے داریوں کا احساس دلانا ہے۔'
رامپور ضلع کے منتخب اساتذہ کو ان کی بہترین کارکردگی کے لیے ایوارڈ بھی تقسیم کیے گئے۔ یہ اعزازات اسکول، کالج اور مدارس کے مسلم اساتذہ کے علاوہ بڑی تعداد میں غیر مسلم اساتذہ کو بھی دیے گئے۔
