نوئیڈا: ریاست اترپردیش کے ضلع نوئیڈا کی ایکوٹیک پولیس اسٹیشن اور ضلع بدر کیے گئے شرپسندوں کے درمیان سرسا گول چکر کے قریب تصادم ہوگیا۔ پولیس کی فائرنگ سے زخمی گینگسٹر کو گرفتار کرکے اسپتال میں داخل کرایا گیا۔ واضح رہے کہ اترپردیش میں پولیس اور گینگسٹر کے درمیان تصادم اور انکاؤنٹر روزانہ کے معمول بن چکے ہیں، پھر بھی جرائم پر قابو نہیں پایا جا رہا ہے اور نہ ہی پولیس کنٹرول کر پا رہی ہے، نہ ہی گینگسٹر جرائم کے ارتکاب سے باز آ رہے ہیں۔
پولیس نے میڈیا سے بات کرتے ہوئے بتایا کہ سرسا گول چکر کے قریب گاڑیوں کی چیکنگ کی جارہی تھی۔ اس دوران صوبہ ہریانہ کے گاڑی نمبر کے کار کو رکنے کا اشارہ کیا گیا، کار ڈرائیور رکنے کے بجائے تیزی سے گاڑی چلاتے ہوئے بھاگنے لگا۔ کار بے قابو ہو کر درخت سے ٹکرا گئی۔ کار سے نیچے اترنے کے بعد گینگسٹر نے پولیس ٹیم پر فائرنگ کردی، جس کے بعد پولیس نے اپنے دفاع میں فائرنگ کی۔ پولیس کی فائرنگ سے سرپسند ٹِنکو زخمی ہوگیا۔
- نوئیڈا میں اب تک کا سب سے بڑا ٹھگی کے کال سینٹر کا پردہ فاش، 84 گرفتار
- شریکانت تیاگی نے 15 گاڑیاں بدلیں، پناہ دینے والے 5 افراد گرفتار
پولیس نے مزید بتایا کہ تفتیش کے دوران پتہ چلا کہ وہ ماڈل پوریا ٹاؤن کا رہنے والا ہے۔ ٹنکو کے خلاف قتل، ڈکیتی، اغوا، گینگسٹر سمیت مختلف معاملات میں مقدمات درج ہیں۔ ایڈیشنل ڈی سی پی اشوک کمار سنگھ نے بتایا کہ بدمعاش سے ایک پستول اور ایک کار برآمد کر لیا گیا ہے۔
