علیگڑھ: اے ایم یو میں سوشل سائنس فیکلٹی کا پی ایچ ڈی داخلہ امتحان منعقد کیا گیا تھا جس میں نقل کرنے کا الزام لگایا جا رہا ہے۔ طلبہ رہنما نبیل عثمانی کے مطابق امتحان کے دوران کلاس روم میں نا صرف موبائل سے نقل کی گئی بلکہ اس کے خلاف آواز اٹھانے والے طالب علم عبیداللہ کی پٹائی بھی کی گئی ہے۔ AMU PhD Entrance Exam 2022
نبیل عثمانی نے مزید کہا کہ 'اگر علی گڑھ مسلم یونیورسٹی کے پی ایچ ڈی داخلہ امتحان میں نقل ہوگی تو ان پڑھنے لکھنے والے طلباء کا کیا ہوگا۔ نبیل عثمانی نے یونیورسٹی انتظامیہ سے امتحان کینسل کرا کر دوبارہ سے کرانے کا مطالبہ کیا ہے۔
وہیں پی ایچ ڈی داخلہ امتحان کے دوران کلاس روم میں موبائل سے نقل کرنے کے الزام کو یونیورسٹی پراکٹر پروفیسر محمد وسیم علی نے خارج کرتے ہوئے کہا کہ "بارہ بجے پیپر ختم ہونے کے بعد دو طلباء کے درمیان آپس میں بات چیت ہوئی اور ایک طالب علم نے دوسرے طالب علم سے کہا کہ تم نے کلاس میں موبائل سے نقل کرنے کی کوشش کی جبکہ دوسرے طالب نے کہا کہ نہیں ایسا کچھ نہیں ہے تم جھوٹ بول رہے ہوں، اسی بات چیت کے دوران دونوں طلبہ کے مابین ہاتھا پائی شروع ہوگئی، موقع پر موجود ہمارے سیکورٹی اسٹاف اور اساتذہ نے آکر معاملے کو رفع دفع کیا۔ Case of fraud in AMU PhD entrance exam
پراکٹر نے مزید بتایا کہ اس کے بعد طلباء ادھر اُدھر چلے گئے اور دوسری شفٹ کا پیپر شروع ہوا جو نارمل ختم ہوگیا۔ ایک سوال کے جواب میں پراکٹر نے بتایا جس طالب علم کی پٹائی کی گئی ہے اس کا نام عبیداللہ ہے اور جس نے مارا ہے اس کا نام تنویر بتایا جا رہا ہے جس کی تصدیق فی الحال نہیں ہوئی ہے۔
