'اعظم خان پر لگے فرضی مقدمات واپس لیے جائیں'

سماج وادی پارٹی کے سینیئر رہنما و رکن پارلیمان اعظم خان اور ان کے بیٹے عبداللہ اعظم خان مختلف مقدمات کے تحت جیل میں بند ہیں۔ اس تعلق سے آج دونوں رہنماؤں کو مراد آباد کے خصوصی کورٹ میں پیشی کے لیے لایا گیا تھا۔

اترپردیش کے پارلیمانی حلقہ رامپور سے رکن پارلیمان اعظم خان اور ان کے بیٹے ایم ایل اے عبداللہ اعظم خان مختلف مقدمات کے تحت سیتاپور جیل میں بند ہیں اور ایک مقدمے کے تحت ان دونوں رہنماؤں کو جمعہ کے روز مراد آباد کی خصوصی ایم پی ایم ایل اے کورٹ میں پیشی کے لیے لایا گیا تھا۔

واضح رہے کہ سنہ 2008 میں مراد آباد کے تھانہ چھجلیٹ میں اعظم خان کے خلاف کیس درج کرایا گیا تھا اور اسی کیس کے سلسلے میں ان دونوں رہنماؤں کو مراد آباد کے خصوصی کورٹ میں پیش کیا گیا۔

اس تعلق سے مرادآباد سے سماج وادی پارٹی کے رکن پارلیمان ڈاکٹر ایچ ٹی حسن نے میڈیا سے بات چیت کرتے ہوئے مطالبہ کیا ایس پی کے سینیئر رہنما کے خلاف عائد کردہ فرضی مقدمات واپس لیے جائیں۔