اناؤ میں جنسی زیادتی سے متاثرہ کو ملزموں کے ذریعہ جلائے جانے اور کل دیر رات دہلی کے اسپتال میں اس کی موت کے بعد مایاوتی نے آج یہاں میڈیا سے مخاطب ہوتے ہوئے کہا کہ مرکزی حکومت خواتین پر ہورہے مظالم کے تئیں قطعی سنجیدہ دکھائی نہیں ہے لہذا سپریم کورٹ اس معاملے کا خود نوٹس لے اور مرکزی حکومت کو اس پر سخت قانون بنانے کی ہدایت دے۔
انہوں نے کہا کہ اترپردیش کی گورنر بھی خاتون ہیں اور وہ آج ان سے اناؤ کے معاملے میں ملنا چاہتی تھیں لیکن گورنر کے کسی پروگرام کی وجہ سے باہر رہنے ہونے سے ملاقات نہیں ہوپائی۔
اب وہ میڈیا کے ذریعہ سے اپنی بات گورنر تک پہنچانا چاہتی ہیں۔ مایاوتی نے کہا کہ گورنر کے پاس کافی آئینی اختیارات ہوتے ہیں وہ چاہیں تو اس کا استعمال کرسکتی ہیں۔
بی ایس پی سپریمو نے یہ بھی کہا کہ ایسے تو پورے ملک میں خواتین پر ظلم ہورہا ہے لیکن اترپردیش میں تو حد ہی ہوگئی ہے۔ روز کوئی نہ کوئی حادثہ پیش آتا ہے وجہ صرف یہ ہے کہ ریاستی حکومت جرائم پیشہ افراد کے خلاف کاروائی کرنے میں ناکام رہی ہے۔
