سنبھل: سنبھل کولڈ اسٹوریج واقعہ کے ذمہ دار کولڈ اسٹور مالکان کو گرفتار کرلیا گیا ہے۔ دونوں ملزمان حادثے کے بعد فرار ہو گئے تھے۔ پولیس نے دونوں ملزمین کو ہلدوانی سے گرفتار کیا ہے۔ واضح رہے کہ 16 مارچ 2023 کو سنبھل کے چندوسی کوتوالی علاقے میں اسلام نگر روڈ پر واقع اے آر کولڈ اسٹور میں چیمبر گر گیا تھا۔ اس میں کام کرنے والے 25 مزدور دب گئے۔ جس کے بعد پولیس انتظامیہ نے ریسکیو شروع کر دیا۔ 30 گھنٹے سے زائد جاری رہنے والے ریسکیو میں 14 مزدور ہلاک جب کہ 11 مزدوروں کو بچا لیا گیا۔ واقعے کے بعد کولڈ اسٹور کے مالکان روہت اگروال اور انکور اگروال موقع سے فرار ہوگئے تھے۔ ان کے خلاف چندوسی پولیس اسٹیشن میں دفعہ 304 کے تحت مقدمہ درج کیا گیا تھا۔
اس واقعہ پر وزیر اعظم نریندر مودی اور وزیر اعلیٰ یوگی آدتیہ ناتھ نے ٹویٹ کرکے مرنے والوں کے تئیں غم کا اظہار کیا تھا۔ وہیں سنبھل ضلع کے وزیر انچارج دھرم پال سنگھ نے قصورواروں کے خلاف کارروائی کرنے کی ہدایات جاری کیں۔ پولیس نے دونوں مفرور کولڈ اسٹور مالک بھائیوں کو گرفتار کر لیا۔ ضلع مجسٹریٹ منیش بنسل نے بتایا کہ کولڈ اسٹور کے مالکان روہت اگروال اور انکور اگروال کو ہلدوانی سے گرفتار کیا گیا ہے۔ دونوں کو آج عدالت میں پیش کیا جائے گا۔ 14 افراد کی ہلاکت کے بعد علاقے میں خاموشی چھائی ہوئی ہے۔ وہیں اتر پردیش کے وزیر اعلی یوگی آدتیہ ناتھ نے اس حادثے میں ہلاک ہونے والوں کے اہل خانہ کو دو لاکھ روپے امداد دینے کا اعلان کیا ہے۔
یہ بھی پڑھیں: Sambhal Cold Storage Collapse سنبھل کولڈ اسٹوریج حادثے کی تحقیقات کے لیے کمیٹی تشکیل
