بی جے پی نے صرف اپنی تشہیرکے لیے کام کیا: پرینکا

کانگریس کی جنرل سکریٹری و مشرقی اترپردیش کی انچارج پرینکا گاندھی واڈرا نے بی جے پی پر صرف اور صرف تشہیر کرنے کا الزام لگاتے ہوئے کہا کہ 'اس نے گذشتہ پانچ برسوں میں پبلسٹی کے سوا کوئی کا م نہیں کیا ہے۔'

کانگریس کی جنرل سکریٹری نے کہا کہ 'بی جے پی کی ترجیح صرف اپنی پبلسٹی کی ہے جبکہ دوسری جانب کسان، نوجوان اور غریب ہر قسم کی پریشانیوں سے دو چار ہے لیکن بی جے پی کو اس کی کوئی فکر نہیں ہے۔'

مہاراج گنج میں صحافت سے سیاسی میدان میں قدم رکھنے والی کانگریس امیدوار سپریا سرینیٹ کی حمایت میں منعقد انتخابی ریلی سے خطاب کرتے ہوئے 'پرینکا نے الزام لگایا کہ مود ی نے کسانوں کے انشورنس پریمیم کے نام پر 10 ہزار کروڑ روپے سرمایہ کاروں کے جیب میں ڈالا ہے۔

نوٹ بندی اور جی ایس ٹی نے ملک کی معیشت کو کمزور کیا ہے جبکہ منریگا جس نے یو پی اے میعاد کار میں کسانوں کی مدد کی تھی اسے بھی کمزور کیا گیا ہے۔'

پرینکا نے دعوی کیا کہ 'بی جے پی کا واحد مقصد اقتدار حاصل کرنا ہے اور اس کے لیے وہ سب کچھ کرنے کو تیار ہے۔'

انہوں نے کہا کہ 'ملک کا مستقبل صرف کانگریس کے ہاتھوں میں محفوظ ہے اور عوام کانگریسی امیدوار کے حق میں ووٹ دیں گے۔کانگریس نے عوام سے کبھی جھوٹے وعدے نہیں کیے ہیں اور اس نے ہمیشہ زمینی سطح پر کام کیا ہے۔'

کانگریس جنرل سکریٹری نے کہا کہ 'اگر کانگریس کی مرکز میں حکومت بنتی ہے تو کسانوں کے لیے الگ سے بجٹ بنایا جائےگا۔ ہم ہر ایک کے لیے لڑنا چاہتے ہیں، آپ کو اپنے مضبوط مستقبل کے لیے حکومت کو تبدیل کرنا چاہیے۔'

کانگریس امیدوار سپریا نے دعوی کیا کہ 'پرینکا کے سیاست میں آنے سے ملک میں نئے سیاسی دور کا آغاز ہوا ہے۔'

انہوں نے عوام سے بی جے پی کی جملہ بازی سے محتاط رہنے کی اپیل کی۔

واضح رہے کہ مہاراج گنج میں اس الیکشن میں سہ رخی مقابلہ ہے جہاں پر بی جے پی کی موجودہ امیدوار پرینکا چودھری، ایس پی امیدوار اکھلیش سنگھ اور کانگریس کی سپریا انتخابی میدان میں ہیں۔

مہاراج گنج میں ساتویں اور آخری مرحلے کے تحت 19 مئی کو ووٹ ڈالے جائیں گے۔