اکھلیش یادو نے انتخابی ریلی سے خطاب کرتے ہوئے کہا کہ سماجوادی پارٹی کے لیے امڈ رہے عوامی سیلاب کو دیکھ کر کچھ لوگوں کے حواس باختہ ہیں۔ جو گرمی نکالنے کی بات کرتے تھے 10 مارچ کو عوام ان کی بھاپ نکال دیں گے۔ Akhilesh Yadav Criticize BJP
انہوں نے کہا کہ 'بی جے پی حکومت سے عوام عاجز آچکے ہیں۔ سال 2022 اسمبلی انتخابات عام انتخابات نہیں ہیں بلکہ یہ اترپردیش کی قسمت اور ملک کو نئی سمت دینے والے ہیں۔
اکھلیش نے کہا کہ بی جے پی لیڈروں اور کارکنان کے الیکشن کے پہلے مرحلے سے ہی اپنی ہار قبول کر کے اپنی گاڑی سے جھنڈے اتار لئے اور گھر پر بیٹھ گئے۔
وزیر اعلی یوگی آدتیہ ناتھ پر حملہ کرتے ہوئے انہوں نے کہا کہ 'بابا جی کے چہرے پر 12 بج گئے ہیں۔ جب بابا جی اسمارٹ فون نہیں چلانا جانتے تھے تو لوگوں میں تقسیم کردیا۔ ان کی ایک تصویر خوب وائرل ہورہی ہے۔ عوام مغرب کی جانب دیکھ رہے ہیں اور بابا جی مشرق کی جانب دیکھ رہے ہیں۔
سابق وزیر اعلی اکھلیش یادو نے کہا کہ ایس پی حکومت بننے کے بعد نوجوانوں کے لئے تقرریاں نکالی جائیں گی۔ شکشا متروں کو اعزاز دیا جائے گا اور بی ایڈ اور ٹی ای ٹی والوں ایڈجسٹ کیا جائے گا۔ بی جے پی حکومت نے تین سال سے کوئی تقرری نہیں نکالی ہے ا س لئے نوجوان بے روزگار ہوگیا۔ اگر نوجوانوں کے لیے سوچا ہوتا تو آج نوجوانوں کو نوکری مل گئی ہوتی سبھی کے ترقی کے لئے صرف سماج وادی پارٹی ہی سوچ سکتی ہے۔
اکھلیش نے وزیر داخلہ امت شاہ کا نام لئے بغیر ان کے بیان پر تبصرہ کرتے ہوئے کہا کہ لیپ ٹاپ کے لئے عوام کو لوٹ پوٹ کرارہے ہیں۔ 12 ویں کے بعد انٹر میں داخلہ لینے پر لیپ ٹاپ دیں گے۔ غنیمت ہے کہ انہوں نے یہ نہیں کہا کہ انٹر کے بعد 10 ویں میں پڑھائی کرنے پر لیپ ٹاپ ملے گا۔
انہوں نے کہا کہ پورا صوبہ مہنگائی سے پریشان ہے جھوٹا وعدہ کر کے اقتدار میں آگئے کسانوں کی آمدنی دگنی نہ کر پائے یہ کسانوں کی بھلائی کیا کریں گے۔
اکھلیش یادو نے کہا کہ بی جے پی کہتی ہے کہ ہماری پارٹی سب سے بڑی پارٹی ہے لیکن ہم لوگ کہتے ہیں کہ سب سے بڑی جھوٹی پارٹی ہے۔ غریبوں کو جھوٹا خواب دکھا رہے تھے کہ ہوائی چپل پہننے والا غریب شخص جہاز میں بیٹھے گا لیکن اس سے پہلے یہ جہاز کو فروخت کردئیے، ائیر پورٹ، بندرگاہ پانی کے جہاز اور ریلوے کی قیمتی زمینوں کو فروخت کردیا ۔نہ رہے گا بانس نہ بجے گا بانسری۔نہ کچھ رہے گا نہ نوکری ملے گی۔
