میرٹھ: ریاست اترپردیش کے ضلع میرٹھ میں ہوئے میونسیپل انتخابات کے نتائج کا اعلان ہوچکا ہے۔میرٹھ کے میئر سیٹ سے بی جے پی میئر امیدوار ہریکانت اہلو والیان نے کامیابی حاصل کی ہے۔ اس کے علاوہ آل انڈیا مجلس اتحاد المسلمین کے 11 کارپوریٹرز کو بھی جیت ملی ہے۔
میرٹھ میں بلدیاتی انتخابات کے تعلق سے جب ہفتہ کے روز ووٹوں کی گنتی کا عمل شروع ہوا تو ابتدائی دور میں ہی آل انڈیا مجلس اتحاد المسلمین کے تمام کارپوریٹرز سبقت بنائے ہوئے تھے۔بالاخر ایم آئی ایم کے گیارہ کارپوریٹرز امیدوار جیتنے میں کامیاب رہے ۔
میرٹھ کے میئر سیٹ کی اگر بات کی جائے تو سماج وادی پارٹی کی امیدوار سیما پردھان کو خاطر خواہ ووٹ نہیں ملا،جس کی وجہ سے انہیں شکست کا سامنا کرنا پڑا۔اور اس طرح بی جے پی کے میئر امیدوار ہریکانت اہلو والیان کو دو لاکھ سے زائد ووٹ حاصل ہوئے۔
بی جے پی کے نو منتخب میئر ہریکانت اہلو والیان نے میڈیا کے نمائندوں سے بات کرتے ہوئے کہا کہ میرٹھ میں جو ترقیاتی کام رک گئے تھے انہیں جلد پورا کیا جائے گا اور میرٹھ کو اسمارٹ سٹی بنانے کے لیے جو اقدامات اٹھانے پڑیں گے ان پر سنجیدگی سے کام کیا جائیگا۔
مجلس کے نو منتخب کارپوریٹرز کے ساتھ ضلع صدر نے ای ٹی وی بھارت سے بات چیت میں کہا کہ 1857 میں میرٹھ سے جنگ آزادی کی لڑائی کی شروعات ہوئی تھی۔اب ہم ایک دفعہ پھر تاریخ رقم کرنے جارہے ہیں۔ ے آل انڈیا مجلس اتحاد المسلمین پر میرٹھ کی عوام اعتماد کا اظہار کیا ہے۔اسی لئے میرٹھ میں سب سے زیادہ ایم آئی ایم کے کارپوریٹرز کو کامیابی ملی ہے۔
