اترپردیش کے ضلع میرٹھ میں ایک معمولی میڈیکل اسٹور کی مدد سے اپنے بچوں کو اعلیٰ تعلیم یافتہ بنانے کے ساتھ ہی ان کو کامیاب ڈاکٹر بنانے کا جذبہ رکھنے والے عامر احمد کے خواب کو ان کے بچوں نے نیٹ کوالیفائی کرکے آج پورا کردکھایا ہے۔ اپنے بچوں کی بہتر تربیت اور اعلیٰ تعلیم دلانے والے عامر نے بتایا کہ وہ جب اپنے چھوٹے سے میڈیکل اسٹور پر دوائی کا کاروبار کرتے تھے تو ہسپتال اور دوکان پر ڈاکٹرز کو دیکھ کر ان کے اندر بھی اپنے بچوں کو ڈاکٹر بنانے کا جذبہ پیدا ہوتا تھا۔
عامر احمد بتاتے ہیں کہ یہی وجہ رہی کہ میں نے اپنے بچوں کو اعلیٰ تعلیم دلانے کے ساتھ ساتھ ان کو بہترین تربیت بھی دی جس کا نتیجہ ہے کہ آج سبھی بچے ڈاکٹر بننے کے لیے تیار ہیں۔
وہیں ڈاکٹر بن رہیں ان کی بیٹیوں کا کہنا ہے کہ کسی بھی کامیابی کے لیے ان کی فیملی کا سپورٹ بہت ضروری ہے. ڈاکٹر فیملی کے نام سے مشہور ہونے والے عامر احمد کو مبارک باد دینے والوں کا سلسلہ مسلسل جاری ہے یہاں تک کہ مقامی رکن اسمبلی رکن سومیندر تومر نے بھی ان کے گھر پہنچ کر ان کی بیٹیوں کے ڈاکٹر بننے پر مبارکباد پیش کی ہے۔
واضح رہے کہ ہمارے سماج میں خاص کرکے مسلم طبقہ میں بیٹیوں کی اعلیٰ تعلیم کی طرف کم ہی توجہ دی جاتی تھی لیکن عامر احمد کی بیٹیاں مثال ہے ان والدین کے لئے جو اپنی بیٹیوں کو گھر میں ہی قید کرکے رکھنا چاہتے ہیں۔ بس ضرورت ہے ان بیٹیوں کو اپنے والدین کے سپورٹ کی تاکہ وہ بھی اعلیٰ تعلیم حاصل کرکے اپنے مستقبل کو روشن کرسکیں۔
