ایک نیوز چینل کے ایڈیٹر ان چیف سے وزیر اعظم نریندر مودی کا پرسنل سکریٹری بن کر نوکری کی سفارش کرنا ایک شخص کو بہت مہنگا پڑا۔ ایڈیٹر کی شکایت پر نوئیڈا کے کوتوالی سیکٹر 20 کی پولیس نے ملزم بھرت ورما کو گرفتار کرکے جیل بھیج دیا۔
نوئیڈا زون کے ڈی سی پی راجیش ایس نے کہا کہ زی نیوز کے چیف ایڈیٹر سدھیر چودھری کو ایک شخص نے فون کیا اور بتایا کہ وہ وزیر اعظم آفس سے بات کر رہے ہیں اور وزیر اعظم نریندر مودی کے نجی سکریٹری وویک کمار بول رہے ہیں۔ گفتگو کے دوران زی نیوز میں بھرت ورما کی نوکری کی سفارش کرتے ہوئے، انہوں نے سدھیر چودھری سے کہا کہ بھرت آکر آپ سے ملاقات کرے گا، آپ اسے اپنے چینل میں نوکری دے دیجیے۔اس کے بعد سدھیر چودھری کو ایک اور فون آیا جس میں کالر نے وزیر اعظم کے نجی سیکرٹری ویوک کمار کا پرسنل معاون ابھیجیت بتاتے ہوئے بھرت ورما کی نوکری کے لئے دوبارہ سفارش کی۔ ملزم کی پہلی کال 18 جون کو آئی تھی۔ اس کے بعد ملزم نے 18 جون اور 22 جون کے درمیان کئی ایس ایم ایس، واٹس ایپ چیٹس اور واٹس ایپ پر وائس کالز کے ذریعے سدھیر چودھری کو نوکری کی سفارش کی۔اس دوران سدھیر چودھری نے بھرت ورما کو فون کیا اور ان سے انٹرویو لیا۔ سدھیر چودھری نے شک کی بنا پر کوتوالی سیکٹر 20 پولیس میں شکایت کی۔ تحقیقات کے دوران ملزم بھرت ورما کو پولیس نے گرفتار کرلیا۔مزید پڑھیں:
مرادآباد: جعلی نوٹوں کے ساتھ پانچ افراد گرفتار
ڈی سی پی راجیش ایس نے بتایا کہ لوگوں کو گمراہ کرنے کے لئے ملزم بھرت ورما نے وزیر اعظم کے ساتھ وزیر اعظم کے پرسنل سکریٹری وویک کمار کی تصویر ٹویٹر سے نکالی تھی اور اپنے واٹس ایپ کی ڈی پی پر لگا دی تھی تاکہ ہر ایک کو یقین ہوکہ وہ اصلی پرسنل سیکرٹری ہی ہے۔