بریلی: اتر پردیش کے بریلی ضلع جیل میں بند عتیق احمد کے بھائی اشرف سے ملاقات کے بعد افسروں، گواہوں اور استغاثہ کے قتل کی منصوبہ بندی کے لیے درج مقدمے میں مفرور اشرف کے سالے صدام کے کرائے کے مکان پر چھاپہ مارا گیا۔ جمعہ کو ایس آئی کی ٹیم نے مکان کو سیل کر دیا اور کالونی کے رہائشیوں کی تصدیق بھی شروع کردی۔ عتیق احمد کے بھائی اشرف کے سالے صدام کے خلاف ایک اور مقدمہ درج کر لیا گیا ہے جس میں دھوکہ دہی سے بنائے گئے مکان کا کرایہ نامہ اور مکان خالی کرنے کی دھمکیاں دینے کا الزام ہے۔ پولیس سپرنٹنڈنٹ راہل بھاٹی کے مطابق سابق رکن پارلیمان عتیق احمد کا بھائی اشرف بریلی کی ضلع جیل میں بند ہے۔ اس کی مدد کے لیے اس کا سالہ پچھلے کئی برسوں سے اس مکان میں کرائے پر رہتا تھا۔ پولیس کا دعوی ہے کہ وہ یہاں رہتے ہوئے وہ اپنی سرگرمیاں انجام دیتا تھا۔
پریاگ راج میں امیش پال اور اس کے دو سیکورٹی اہلکاروں کو مبینہ طور پر عتیق احمد کے ساتھیوں نے گولی مار کر ہلاک کر دیا۔ اس معاملے میں پولیس نے بریلی ڈسٹرکٹ جیل میں بند عتیق کے بھائی اشرف پر سازش رچنے کا الزام لگایا۔ پولیس سپرنٹنڈنٹ راہل بھاٹی کے مطابق جیل میں اشرف اور اس کے ساتھی پولیس افسران، استغاثہ اور گواہوں کو قتل کرنے کا منصوبہ بنا رہے تھے۔ کئی سنگین دفعات کے تحت مقدمہ درج کیا گیا۔ تھانہ بارادری کی پولیس نے مکان مالک کی جانب سے اشرف کے سالے کے خلاف جعلی دستاویزات کی بنیاد پر مکان کا کرایہ نامہ بنانے اور مکان خالی نہ کرنے پر دھمکیاں دینے جیسی دفعات کے تحت مقدمہ درج کیا۔
پولیس سپرنٹنڈنٹ راہل بھاٹی نے بتایا کہ اس سلسلے میں ایس آئی ٹیم کے ساتھ کئی تھانوں کی پولیس فورس اسی کرائے کے مکان پر پہنچی جہاں صدام پچھلے کئی برسوں سے رہ رہا تھا۔ لیکن وہ موقع پر موجود نہیں تھا۔ جس کے بعد پولیس نے گھر کے کمروں کو سیل کر دیا۔ ٹیم کی جانب سے کالونی کے دیگر گھروں میں رہنے والے افراد کی بھی تصدیق شروع کردی گئی ہے اور ٹیم گھر گھر جا کر لوگوں کی معلومات اکٹھی کر رہی ہے۔