بریلی: مسلم محلہ میں آلودہ پانے کے سبب لوگ پریشان

بریلی میونسپل کارپوریشن کی غفلت کے سبب پرانا شہر کے کئی علاقوں کی صورتحال ابتر ہے۔ سڑکیں تو پہلے سے ہی خستہ حال ہیں۔ مزید برآں یہ ہے کہ آلودہ پانی سڑکوں کے اوپر بہہ رہا ہے۔ جس کے سبب بزرگ، بچے اور خاص طور پر خواتین کا گھر سے نکلنا مشکل ہوگیا ہے۔

پرانے شہر کے قریش نگر علاقے کے لوگوں کا کہنا ہے کہ ان دنوں سڑک اور پانی کے مسئلہ سے دو چار ہونا پڑرہا ہے۔ یہاں کی سڑکیں خستہ حال ہیں اور آلودہ پانی سڑکوں پر بہنے کی وجہ سے لوگوں کو کافی مشکلات کا سامنا کرنا پڑ رہا ہے۔ بچے ٹیوشن جانے سے قاصر ہیں۔ تو وہیں خواتین کا گھر سے باہر نکلنا مشکل ہوگیا ہے۔

دراصل یہ سڑک قریش نگر اور صوفی ٹولہ دو وارڈز کےدرمیان حد قائم کرتی ہے۔ دونوں وارڈز کے مقامی باشندوں نے متعدد مرتبہ بریلی میونسپل کارپوریشن کے افسران سے ملاقات کرکے سڑک کی مرمت کرانے کے لئے درخواست دی ہے۔ لیکن اب تک معاملہ جوں کا توں ہے۔

دو وارڈز کو تقسیم کرکے مدینہ مسجد تک جانے والی اس سڑک کے دونوں طرف کل 45 مکانات ہیں اور تمام مکانات کے مکین مسلمان ہیں۔

ان مکانوں سے درجنوں لوگ نماز ادا کرنے کے لئے گھروں سے نکلتے ہیں۔ خستہ حال سڑک پر نالیوں کا پانی بہنے کی وجہ سے کپڑے خراب ہونے کا خدشہ رہتا ہے۔ موٹر سائیکل کی بات تو دور یہاں سے پیدل نکلنا بھی مشکل ہے۔

بہرحال بریلی میونسپل کارپوریشن یعنی بی ایم سی میں موجودہ کارپوریٹرس کی میعاد کا تقریباً چار برس کا عرصہ مکمل ہونے کو ہے۔ اس کے باوجود سڑک خستہ حال ہے۔ مقامی باشندے دبی زبان میں بی ایم سی کی غفلت کا ذکر کرتے ہیں، لیکن بی ایم سی کو اس سے کوئی فرق نہیں پڑتا۔