ای ٹی وی بھارت سے بات کرتے ہوئے خوانچہ فروش تنظیم کے رہنما ابھیشیک نگم نے کہا کہ پردھان منتری سُوانِدھی یوجنا کے تحت کارپوریشن پورے شہر میں غیر قانونی طریقے سے ٹھیلہ لگانے والوں کے خلاف کارروائی کر رہی ہے اور ان کے ٹھیلوں کو ضبط کر رہی ہے۔
انہوں نے کہا کہ میونسپل کارپوریشن نے وعدہ کیا ہے کہ جلد ہی ٹھیلہ لگانے والوں کے لیے وینڈنگ زون بنایا جارہا ہے جس میں رجسٹریشن کر کے ٹھیلہ لگانے کی اجازت ہوگی اس کے تحت پورے شہر میں یہ کاروائی جاری ہے۔
انہوں نے کہا کہ میونسپل کارپوریشن اگر جلد ہی وینڈنگ زون نہیں بنائے گی تو ہم لوگ کثیر تعداد میں سڑک پر اتریں گے اور انتظامیہ کے خلاف احتجاجی مظاہرہ کریں گے۔
انہوں نے مزید کہا کہ ٹھیلہ لگانے والے شہر میں لاکھوں کی تعداد میں موجود ہیں اور اس سے لاکھ افراد کی روزگار متاثر ہو سکتی ہے اگر کارپوریشن نے اس معاملے کو لے کر سنجیدگی کا مظاہرہ نہیں کیا تو اس کے نتائج خطرناک ثابت ہوں گے۔
انہوں نے مزید بتایا کہ کورونا وائرس قہر کے دوران ٹھیلہ لگانے والے افراد نے شدید مشکلات کا سامنا کیا ہے اور اب جب کاروبار معمول پر آ رہا ہے تو میونسپل کارپوریشن کی کاروائی یقیناً افسوسناک ہے۔
