کورونا وبا کے سبب گزشتہ تقریباً دو برسوں سے علی گڑھ مسلم یونیورسٹی کے طلبہ کو پرائیویٹ کمپنیاں آن لائن انٹرویوز کے ذریعے ملازمت فراہم کر رہی تھیں لیکن اب یونیورسٹی کُھلنے کے بعد پرائیویٹ کمپنیاں آف لائن انٹرویوز کے ذریعے انہیں ملازمت فراہم کرنے کے لیے پہنچ رہی ہیں جس سے اسٹوڈنٹس میں خوشی دیکھی جا رہی ہے۔ عظیم پریم جی فاؤنڈیشن Azim Premji Foundation کی تین رکنی ٹیم علی گڑھ مسلم یونیورسٹی کے ٹریننگ اینڈ پلیسمینٹ سینٹر پہنچی جہاں پر وہ گریجویشن اور پوسٹ گریجویشن کے طلبہ و طالبات کے آف لائن انٹرویوز سے ملازمت کے مواقع فراہم کر رہی ہے۔
اے ایم یو کے ٹریننگ اینڈ پلیسمنٹ سینٹر کے آفیسر سعد حمید نے بتایا کہ گزشتہ دو برسوں سے کورونا وبا کے سبب یونیورسٹی آن لائن تھی اور پرائیویٹ کمپنیاں آن لائن انٹرویوز کر کے ملازمت کے مواقع فراہم کر رہی تھی لیکن اب کمپنیوں نے یونیورسٹی کیمپس آنا شروع کر دیا ہے جو یقیناً یونیورسٹی اور خاص کر طلبہ کے لیے خوشی کی بات ہے۔ عظیم پریم جی فاؤنڈیشن کے اسٹیٹ ہیڈ کیلاش چند نے بتایا گزشتہ دو سالوں سے مختلف یونیورسٹیز کے طلبہ آن لائن کلاسز کر رہے تھے جن سے ان میں اب آف لائن انٹرویوز میں وہ بات دیکھنے کو نہیں مل رہی جو پہلے مِلا کرتی تھی حالانکہ کچھ یونیورسٹیز کے طلباء نے لاک ڈاؤن کے دوران اعتماد اور جوش و جذبے کو برقرار رکھا تھا۔ کیلاشن چند نے مزید بتایا ہم گزشتہ چار پانچ برسوں سے علی گڑھ مسلم یونیورسٹی طلبہ کے پلیسمنٹ کے لیے آرہے ہیں اب دو سال کے بعد آنا ہوا ہے ظاہر سی بات ہے طلباء کو ملازمت فراہم کرنے کے لئے جو بات آف لائن انٹرویو میں ہوتی ہے وہ آن لائن انٹرویو میں نہیں ہوتی۔
