اعظم خان کے لیے 72 گھنٹے اہم

میدانتا اسپتال کے ڈائریکٹر راکیش کپور نے کہا کہ 'سماج وادی پارٹی کے سینیئر رہنما اعظم خان کو آج آکسیجن کی ضرورت کم ہے۔ وہ کھانا کھا رہے ہیں، ان کی حالت مستحکم ہے۔ اُن کے لیے اگلے 72 گھنٹے بہت اہم ہیں۔'

سماج وادی پارٹی کے سینیئر رہنما اعظم خان کی طبیعت گزشتہ روز کے مقابلے تھوڑی بہتر ہوئی ہے۔ میدانتا ہسپتال نے میڈیکل بلیٹن جاری کرتے ہوئے جانکاری دی ہے۔

ایس پی کے رکن پارلیمنٹ اعظم خان کو سیتاپور جیل سے 9 مئی کو میدانتا اسپتال میں بھرتی کیا گیا تھا۔

اعظم خان کو پہلے دن 4 لیٹر آکسیجن کے ساتھ ڈاکٹروں کی نگرانی میں رکھا گیا تھا جبکہ 11 مئی کو حالت تشویشناک ہوئی تو اُنہیں 10 لیٹر آکسیجن پر رکھا گیا تھا۔

میدانتا ہسپتال کے ڈائریکٹر راکیش کپور نے میڈیکل بلیٹن جاری کرتے ہوئے جانکاری دیتے ہوئے بتایا کہ 'اعظم خان کو آج آکسیجن کی ضرورت کم ہوگئی ہے۔ وہ کھانا کھا رہے ہیں، ان کی حالت مستحکم ہے۔ اُن کے لیے اگلے 72 گھنٹے بہت اہم ہیں۔ اُن کے بیٹے عبداللہ اعظم کی طبیعت کافی بہتر ہے۔'

قابل ذکر ہے کہ 14 ماہ سے سیتاپور جیل میں قید اعظم خان سے متعلق یکم مئی کو سیتاپور جیل انتظامیہ کی جانب سے خبر آئی تھی کہ اعظم خان کورونا پازیٹیو ہو گئے ہیں۔

جس کے بعد سیتاپور کے افسران نے ان کو جیل سے باہر لکھنؤ یا دہلی کے اسپتال میں علاج کے لئے لے جانے کی کوشش کی تھی حالانکہ اعظم خان نے خود کو فٹ بتاتے ہوئے اسپتال جانے سے انکار کر دیا تھا لیکن دوبارہ طبیعت خراب ہونے پر اعظم خان کو لکھنؤ کے میدانتا ہسپتال لے جایا گیا تھا۔