کام شروع کرنے سے قبل ویدک اچاریہ کے ذریعہ پوجا کی گئی۔ ابھی تک رام للا کے گربھ گرہ کے مقام کے چاروں طرف کا ملبہ ہٹایا جارہا تھا۔ جمعرات سے گربھ گرہ کے مقام پر بنیاد ڈالنے کا کام شروع کردیا گیا ہے۔
رام جنم بھومی کے پُجاری اچاریہ ستیندر داس نے بتایا کہ رام للا کے گربھ گرہ کے مقام کے نزدیک بھی کام شروع کردیا گیا ہے۔ اس سے قبل وہان پوجا کی گئی۔
انہوں نے بتایا کہ گزشتہ پانچ اگست کو وزیراعظم نریندر مودی کے ذریعے بھومی پوجن کئے جانے کے بعد ہی ہر روز گربھ گرہ کے مقام پر ہون اور دیئے جلانے کا سلسلہ جاری ہے۔
مکر سکرانتی کے بعد رام جنم بھومی ٹرسٹ کی ہدایت پر تعمیراتی ادارے لارسن اینڈ ٹوبرو نے آج صبح بنیاد کی کھدائی شروع کرادی۔ کام کو تیز کرنے کے لیے ایک اضافی پوک لینڈ بھی لگایا گیا ہے تاکہ کام جلد از جلد مکمل ہوسکے۔
اس دوران آج ٹرسٹ کی مندر تعمیراتی کمیٹی کی دو روزہ میٹنگ شروع ہورہی ہے۔
