ریاست اترپردیش کے بارہ بنکی میں گاندھی آشرم کے قیام کے 100ویں برس کے موقع پر ہو رہی تقریبات کی ترتیب میں جمعہ کو آتم نربھر بھارت پیدل مارچ نکالا گیا۔
گاندھی جینتی سماروہ ٹرسٹ کی جانب سے نکالے گئے اس مارچ میں تمام پارٹیوں اور مختلف سماجی تنظیموں سے وابستہ لوگوں نے شرکت کی۔
آتم نربھر بھارت پیدل مارچ کا آغاز شہر کے فضل الرحمان سے ہوا۔ سابق ریاستی وزیر اروند سنگھ گوپ نے ہری جھنڈی دکھاکر اس مارچ کو روانہ کیا۔ یہ مارچ راج کمل، چھایا، گھوسیانا ہوتے ہوئے دیوی روڈ واقع گاندھی بھون میں اختتام ہوا۔
اس موقع پر پیدل مارچ کے کنوینر اور گاندھی جینتی سماروہ ٹرسٹ کے سربراہ راج ناتھ شرما نےکہا کہ یہ مارچ اس لئے ہے کہ ملک کے وزیراعظم نریندر مودی ملک کو آتم نربھر بنانے کی بات تو کرتے ہیں لیکن ملک آتم نربھر کیسے ہوگا اس کے لئے کچھ نہیں بتاتے۔
یہ بھی پڑھیں: وسیم رضوی کے خلاف آل انڈیا شیعہ کونسل کی میٹنگ
انہوں نے کہا کہ مہاتما گاندھی اور جنگ آزادی کے تمام رہنما جیسے سردار پٹیل، مولانا آزاد، حسرت موہانی اور بادشاہ خان جیسے لوگوں نے کہا تھا کہ کھادی سے ہی ملک میں کاروبار کا اضافہ ہوگا، اسی سے ملک بااختیار ہوگا۔ اس لئے یہ پیدل مارچ انہیں آگاہ کرنے کے لئے ہے کہ بغیر کھادی، بغیر دیہی صنعت کے بھارت آتم نربھر نہیں بن سکتا ہے۔
