ریاست اترپردیش کے ضلع علی گڑھ کے تھانہ سول لائن علاقے کے مرس روڈ چوراہے پر دیر رات جانوروں کے تاجر جمال کو گولی مار کر ہلاک کردیا گیا۔ پولیس نے موقع پر پہنچ کر جائے واردات سے ملزم کو گرفتار کرلیا ہے۔
علی گڑھ کے تھانہ دہلی گیٹ کے علاقے خواجہ چوک سرائے میاں کے رہائشی جمال ولدیت حمید پہلوان کو دیر رات سول لائن علاقہ کے مرس روڈ چوراہے پر ایک کار سوار نے گولی مار کر اس وقت ہلاک کردیا جب جمال اپنے تین سالہ بچے اور ایک پڑوسی کے ساتھ اپنی آئی 20 کار سے گھومنے گیا ہوا تھا۔ موقع سے پولیس نے گولی چلانے والے ملزم کو کار اور پستول سمیت گرفتار کرلیا ہے۔ حادثے کی اطلاع ملتے ہی علی گڑھ ایس ایس پی کالاندھی نیتھانی موقع پر پہنچے اور انہوں نے مقتول کے لواحقین کی شکایت پر مقدمہ درج کرلیا ہے۔
چشم دیدوں کے مطابق دہلی گیٹ کے علاقے خواجہ چوک کا رہائشی جمال رات تقریباً 11 بجے اپنے تین سالہ بیٹے اور پڑوسی کے ساتھ اپنی کار آئی ٹونٹی سے سیر کے لئے نکلا تھا، انہوں نے مرس روڈ سے عبداللہ اسکول جانے والے راستے میں ایک دکان کے سامنے گاڑی روکی۔ اسی وقت سامنے سے آرہی آلٹو کار کی ایک گاڑی سے ٹکر ہونے کی وجہ سے تنازعہ شروع ہوگیا تھا، لیکن کچھ دیر بعد جس گاڑی سے ٹکر ہوئی تھی وہ وہاں سے چلی گئی۔ ماحول تب سنجیدہ ہوگیا جب آلٹو کار میں سوار نوجوان نشے کی حالت میں گاڑی سے نکلا اور اس نے چوراہے پر ہتھیار نکالتے ہوئے قریب میں کھڑی جمال کی گاڑی کی طرف بڑھ کر کار کا دروازہ کھولا اور فائرنگ شروع کردی۔
اس حادثے میں مویشی تاجر جمال کو ایک گولی سینے میں لگی، جس کے بعد اسے زخمی حالت میں میڈیکل کالج میں داخل کرایا گیا جہاں اس کی موت واقع ہوگئی۔
وہیں چشم دیدوں کے بیان کے برعکس جمال کے اہل خانہ نے جمال کے سسرال والوں پر قتل کا الزام عائدکیا ہے۔ سول لائن علی گڑھ کے ڈی ایس پی شویتابھ پانڈے نے بتایا کہ مرس روڈ چوراہے پر ہوئے واقعہ میں الٹو کار سوار نے تاجر کو گولی مار کر قتل کردیا۔ ان کے رشتہ داروں کی تحریر کے مطابق مقدمہ درج کرلیا گیا ہے، جس میں رشتہ داروں نے ہلاک ہونے والے کے سسرال والوں پر الزام عائد کیا ہے۔ اس معاملے میں ملزم سے پوچھ گچھ جاری ہے۔
