آنگن باڑی مراکز کی جانب سے بچوں کو راغب کرنے کے مقصد سے ریاست اتر پردیش میں تمام آنگن باڑی مراکز کو یکساں کر کے ان کی برانڈنگ کی جائے گی۔
یہ اطلاع ریاستی وزیر مملکت (آزاد چارج) محکمہ خواتین بہبود اور اطفال ترقی و غذائیہ سواتی سنگھ نے دی ہے۔ اس کے لئے انہوں نے افسران کو وزیراعظم نریندر مودی کے انتخابی حلقہ بنارس میں بنائے گئے آنگن باڑی مرکز سے سیکھنے کی ہدایت دی ہے۔
بارہ بنکی میں جمعرات کو 21 آنگن باڑی مراکز کو عوام کو معنون کرنے کے بعد نامہ نگاروں سے گفتگو کرتے ہوئے ریاستی وزیر مملکت (آزاد چارج) سواتی سنگھ نے کہا کہ ہم آنگن باڑی مراکز کو اپگریڈ کر رہے ہیں۔
انہوں نے کہا کہ نئی تعلیمی پالیسی کے مطابق بھی آنگن باڑی مراکز کی جدید کاری کی ضرورت ہے، کیونکہ بچوں کی ابتدائی تعلیم یہاں سے شروع ہوتی ہے، جس کی اہمیت مسلم ہے۔
انہوں نے کہا کہ زیادہ سے زیادہ بچے آنگن باڑی مراکز میں آکر بنیادی تعلیم حاصل کر سکیں اس کے لئے ہم کوشش کر رہے ہیں کہ تمام آنگن باڑی مراکز یکساں لگیں، اس کے لئے ہم ان کی برانڈنگ کرنے کی کوشش میں لگے ہیں۔
